Tamasa 100 ksing | Sdang ka Wangala da ki jingialehkai tynrai |Tuid ki nongshangkai na kylleng ki ri ka Pyrthei

Shillong, Naiwieng 07 : Ka 100 Hundred Drums Wangala Festival kala sdang hynne ka sngi Palei da ka jingpynlong ia ki jingialehkai tynrai ne Indigenous Games ryngkat bad ka jingpyninam ia ki tiar shna kti bad jingthain (Handloom & Handicrafts Exhibition) ba la pynmih hi da ki nongshongshnong bad ki nongsengkam lajong jong ka thain, kaba la pynlong ha Wangala A’dam, Chibragre, West Garo Hills naduh ka 7-9 tarik u Naiwieng.

Ha ka sngi nyngkong jong katei ka festival, u Deputy Commissioner, ka West Garo Hills u Jagdish Chelani ula plie ia ka Nokpante bad Nokmong lane Noka’chik kaba la tei da ka Wangala A’dam kum shi bynta jong ka jingtei ia ki kam pynroi kiba la iaid ha ki wat bapher bapher ban lah ban kyntiew shuh shuh ia ka Garo Heritage Village.

Lah ban kdew ba ka Nokpante kadei ka Bachelor’s Dormitory ha kaba ki samla Garo ki lah ban shong ban sah ban ban ioh ia ki jinghikai na ka bynta ka lawei ka jongki, katba ka Nokachik kadei ka iing tynrai jong ki Garo kaba la shna da ka jingpyndonkam ia ki siej bad ki dieng kaba iar haduh 10-45 mitar, ka don iaka kamra shongkai kaba la khot ka “Dongrama” kaba don ia ka jaka syaid ding bad kiwei kiwei bad kane kadei da ka jingthmu ban plie lad ia ki nongwad bniah ba kin leh ia ki kam wad bniah ki jongki.

U Deputy Commissioner ula plie ruh iaka Handloom and Handicraft Exhibition ha kaba la donlang u Symbud Kongsan u Principal jongka Harding Theological College, Eden Bari Tura Dr. Imnanungshi Imsong, u Deputy CEM GHADC u Nikman Marak, u Joint Secretary ka GHADC u Peter R Marak, u Chairman jongka Hundred Drums Wangala Festival Committee (HDWFC) u Ronald Rikman Ch Sangma bad u Secretary ka HDWFC Salgira A Sangma bad kiwei kiwei.

U Jagdish Chelani ula ong ba kane ka long ka tamasa kaba kongsan ym tang ia ka Garo Heritage Village hynrei ia ka jaidbynriew hi baroh kawei bad ba ka kolshor ki Garo ka don bun ia kiei kiei kaba ka lah ban pyni sha ka pyrthei bad ka kyntu ba kidei ban kyntiew iaka kolshor bad ban khring ia ki nongjngohkai na kiwei pat ki jylla bad na kylleng bad ula pynpaw ba u don ia ka jingkyrmen ba kitei ki jingdon jingem kin pyni nam ia karukom ngeit, ka riti ka dustur tynrai jong ka kolshor ki jaidbynriew Garo.

U Ronald Rikman Sangma ula ong ba la pynlong ia katei ka tamasa ha katei ka jaka hadien shi snem bad ka jingpynlong mynta ruh ka long ha ka jaka ka bym pat da biang bha bad ha kine ki sngi ban wan yn sa skahi biang iaka jingiaid shakhmat jong ki kam ha kaban tei ia ki jingtei bapher.

Ula ong ba ka long ka burom kaba khraw ia baroh ki Garo namar ba ia kane ka festival lah ban rakhe da ka jingmut ban pynneh pynsah bad ban pyninam iaka kolshor ba riewspah bad ia ka riti dustur tynrai jong ki Garo.

Haba batai shaphang kane ka festival, ula ong ba ka riti dustur ka long kaba kyrpang bad dei ban pynneh pynsah na ka bynta ki pateng abn dang wan bad ula pynpaw iaka jingsngewnguh ia ka sorkar pdeng abd sorkar jylla ban ai jingkyrshan da ka song tyngka ban pynlong ia kane ka tamasa.

Lah ban kdew, ba ka Wangala kadei ka jinglehkmen hadien ka aiom rep jong ki Garo ia kaba la pynlong ha ka taiew baar jong u Naiwieng. Kadei ka jingai khublei bad jingainguh ia ka Misi Saljong kaba la tip ruh kum ka Pattigipa Ra∙rongipa (The Great Giver) halor ka jingkyrkhu ia ki paidbah ba kin ioh ban kheit ia kajingsei soh ha ka rep ka riang ka jongki.

Ia ka Hundred Drums Wangala festival la sdang ha u snem 1976 ha Asanang, kaba long ka Headquarters jongka Rongram Development Block hajan Tura bad kane ka jaka kala nang kiew bad nang bha lyngba ka jingkyrshan ka sorkar jylla bad ka jingpeit jingkhmih jong ka kynhun kaba pyniaid ia katei ka Festival.

Ha ka nsgi sdang jong ka Festival, la pynlong ia ki jingialehkai tynrai kum ka Wa∙pong sika, Jakpong Pe∙a, An∙ding O’ka, Rongma Desusa∙a na ka bynta ki shynrnag, Rongma Chilsusa∙a ia ki kynthei. Nalor kane ha kane ka jingrakhe kaba mynta u snem la ioh ruh ia ka jingshad kyrpang na ka OPATA bad ASA, NEHU, Tura Campus.

La pynlong ruh ia ka jingiakob shet jingbam tynrai ne ka Master Chef Competition bad ka Indigenous Slow Food Competition kaba la tip kum ka Brenga (ia kaba la shet ha ki tyndong siej) bad We∙tepa (ia kaba la shet ia ki jingbam da kaba sop da ki sla kait ha ka ding ka bym da rhem bha).

Ha ka jingiakob tan tyllai, ka kynhun na Rongkhon kala long ka lahduh katba ka All Garo Hills MeECL kala wan baar ki nongjop kila ioh ia ka khusnam abd ka song tyngka.
Ha ki sngi ba bud, yn pynlong ruh ia k ajingiakob rwai tynrai, Rugala, Chachat So∙a bad Rhythm of 100 Drums.