Kyrpang ka Synjuk Rangbah Shnong ba iarap synniang lem mar T.1 shaneng
Nongstoiñ, Jylliew 04: Ki paid Nongshongshnong ki 15 tylli ki Dorbar Shnong ka West Khasi Hills, kila lum synniang hi mar T.100 shi iing, ban shna dalade ia ka surok Langdongdai-Mawkyllon, kaba jngai kumba 6 km tam.
Kane ka jingialum synniang kala wan jia hadien ba ki jingud jingnam bad ki jingkyrpad bala bun bun snem, kila poi sha ki skhor kiba kyllut jong ki bor Sorkar kiba dei khmih ia kane ka kam.
Kane ka surok ka dei kaba donkam eh ia ki 15 tylli ki Shnong bad palat 2000 ngut ki nongshongshnong hynrei kala jot rathai kaba wat ki Ophisar Sorkar kila iohi dala ki jong ki khmat haba ki wan pyndep kam sha ka thain Langdongdai.
Ka jingsniew kane ka surok kala ktah jur ia ki paidbah khamtam ki longkmie kiba armet bad kiba pang jur, kiba bunsien kim la hap shuh ban poi shaduh sha CHC Riangdo ban ioh ia ka jingsumar.
Namar kane ka jingeh, ka Synjuk ki Rangbah Shnong ka thain Nongtrai Sepngi, kila lum da ka Dorbar pyllun bad da ka jingiatylli lang, kila rai ban ia maramot hi noh ia ka surok bad ban lum synniang na man ki thliew iing bad ki trai kali.
La pyntip ba ka synniang na ka bynta kawei pa kawei ka longiing ka long mar T.100, ki kali pat ki long-ka pickup T.500,Sumo-300, maruti car-200.
Da ka jinglum synniang, ka Synjuk kala lah ban aiwai ban pynshna bha ia kane ka surok ha ka dor ba T.1,40,000 eiei.
U Nongialam ka Synjuk Bah Birbor Riangtem ula pynpaw ia ka jingdiaw mynsiem bad jinglyngngoh ba watla ka Sorkar Pdeng kala ithuh ia ka shnong Langdongdai kum ka Aspirational Village hynrei kane ka jingithuh ka shu kut tang ha ki jingthoh bad ym shym la don ba phaikhmat sha ka eh ka shon ki trai shnong la ka dei na ka Sorkar Jylla ne Sorkar Pdeng.
Namar kane, ka Synjuk kala buh ka jingkyrpad ia ki paidbah ka Jylla bad kiba nabar ruh kumjuh ba lada ki don ia ka jing sngewlem ia ka jingeh ka thain, ba kin iarap lem da kaba synniang pisa naduh T.1 shadeng lyngba ka QR code.
Ula pynpaw ruh ba nangne shakhmat, baroh ki Ophisar Sorkar, ki Nongmihkhmat paidbah kiba pyndonkam ia kane ka surok, ki dei ban siew ia ka bai iaid lynti hala ki jong ki jong ki dor kiba la Synjuk kala buh.
