Shillong, Jylliew 04 : Haba niew ia ki phra tylli ki Jylla ka thain Shatei Lam Mihngi kum ka lawei jong ka “Ashtalakshmi of India”, u Myntri ka DoNER Jyotiraditya M Scindia ha ka sngi Palei ula ong ba ka thain kan long “bynta ba kongsan eh” jong ka Viksit Bharat hapoh u 2047, hadien ka jingpruid lynti da u Myntri kam Pohiing Amit Shah.
Haba kren shabar jong ka jingialang 73rd NEC Plenary ha Shillong, u Scindia bad u Shah kila buh ia ki mat treikam na ka bynta ka North Eastern Council bad ki phra tylli ki Jylla na ka bynta u snem ban wan.
“U Myntri kam Pohiing ula buh ia ka lynti iaid na ka bynta ka NEC bad jong baroh phra tylli ki Jylla na ka bynta kine ki 12 bnai ban wan. Ngi mynta ngin sdang ban trei ia ki kam kat kum ka jingbthah jong u” ula ong.
“Hapoh ka jingialam u Myntri Rangbah Duh, ki phra tylli ki Jylla kila nang kiew na kawei ka bor sha kawei pat” bynrap u Scindiahaba pynpaw “Kin sa long ki Ashtalakshmi ka India katba ngi dang iaid lynti sha ka Viksit Bharat 2027”.
U Myntri ula ain am ia ka jingiohi jngai jong u Myntri Rangbah Duh Narendra Modi, uba la pyntyllun ia ka roi ka par ha ka thain.
“Ka jingiaid jong ka roi ka par kaba ka thain Shatei Lam Mihngi kala leh hapoh ka jingiohi jngai jong u Myntri Rangbah Duh kala lam sha ka jingkiew bun shah ka ioh ka kot ha man ki jaka jong ka thain” ula ong.
Haba khmih shakhmat sha u 2047, u Scindia ula ong ba ka bynta jong ka thain ka long kaba kongsan bha.
“Hapoh u 2047 katba ka Bharat ka kylla long ka Viksit, ka thain Shatei Lam Mihngi kan long ka jaka pdeng ba kongsan eh jong ka Viksit Bharat 2047” ula ong.
Ka NEC Plenary ba arsngi, kaba la pyniaid da u Amit Shah, ka shong bishar ia ki project kiba dang iaid bad ban shim rai ia ka roi ka par ba donkam hakhmat eh na ka bynta ki Jylla ka thain Shatei Lam Mihngi na ka bynta u snem 2026-27.
