Shillong, Nailur 02: Ki Samla ba pule Law ha North Eastern Hill University (NEHU) kila mad ia ka jingeh kaba khraw bad bun ruh ki babe ba ki leit pule ha kane ka skulbah ba don ha Jylla namar ka jingbym lah ban pynbiang ia ki Nonghikai kat kum ka jingdonkam.
Kane ka jingkyrduh Nonghikai ha kane ka skulbah kala paw pyrthei hadien baka seng Federation of Khasi Jaintia & Garo People (FKJGP), kala leit tohkit hi dalade ha kane ka skulbah halor ka jingud jingnam shaba palat jong ki samla pule bad ki Kmie ki Kpa.
Kane ka Seng hapoh ka jingialam u Education Secretary Bah Gabriel Sun, kala iakynduh ia u Pro Vice Chancellor ka NEHU Prof Henry Lamin, Registrar Prof S K Dixit bad u Head of Department ka Tnad Law Chintamani Raut ban iakren ia kane ka kam.
Haba iaken bad ki nongthoh khubor hadien ka jingiakynduh ia ki bor pyniaid ka NEHU, u Bah Gabriel ula iathuh ba ka seng kala ioh pdiang ia shibun ki jingujor na ki samla pule bad ki Kmie Kpa kiba la phah ia ki Khun ban pule Law ha NEHU.
“Kane ka skulbah kala mad ia ka jingkyrduh Nonghikai, kaba la ktah jur ia ka jingpule jong ki samla” ula ong haba pyntip ba u Pro Vice Chancellor ula pyntip baka Skulbah ka dang pynkhreh mynta ban shu thep kam kontrak noh ia ki Nonghikai ha ki kam ba lait jong kane ka Tnad pule.
U Bah Gabriel ula pyntip ruh ba ha ka jingiakren, u Pro Vice Chancellpr ula kular ba kane ka jingthungkam ia ki Nonghikai yn sa pyndep noh hapoh ka 10 sngi.
“Ka jingduna jong ki Nonghikai ha ka Tnad kala ktah jur ia ki samla pule khamtam ha kaban pyndep ia ka course…ta ka daw ka por kala dei ia ka Tnad ban leh eiei ia kane ka kam na ka bynta ka bha ka miat ki samla pule” ong u bah Gabriel.
Haba dawa ia ka NEHU ban thung mardor noh ia ki Nonghikai ha ka Tnad, ka FKJGP kala ong “Lada ka skulbah kam lah ban thungkam hapoh ka 10 sngi, ka seng kam banse ban leh eiei pyrshah ia kane ka Tnad Pule”.
