Shillong, Nailur 09: U jumai uba jur bha bad ba kot haduh 6.8 magnitude ula syllad ia ka Ri ba Shatei jong ka Africa-ka Morocco ha ka miet sngi Thohdieng ha kaba palat 300 ngut ki briew kila iap bad bun spah ngut kila mynsaw.
Une u jumai ula khynniuh shaphang shathie sepngi jong ka Marrakesh ha ka jingjylliew ba 18.5 kilometer. Kane ka jingjia kala jia ha ka por 11:11 baje mynmiet, ong ka US Geological Survey. Hadien 20 minit ula khynniuh biang bad kot haduh 4.9 magnitude.
Une u jumnai ula pynjulor ia kiba bun ki jingtei ha kane ka Sor Marrakech bad ki shnong nongkyndong. Ki Nongshong shnong kim shym nud shuh ban mih sha surok namar ka jingsheptieng ioh khie biang u jumai.
Ka Tnad korbar Ri ka Morocco ka pyntip hynne ka step sngi Siatjain ba ki briew ba iap kila kot haduh 296 ngut bad la pynkynriah ruh haduh 153 ngut ki briew ba mynsaw sha Hospital.
Tad haduh ba thoh ia ka khubor, ka jingiap jong ki briew kala tam ia ka 300 ngut.
Ia une u jumai la iohsngew ruh ha ki sor ba jan duriaw ka Rabat, Casablanca bad Essaouira.
Ki lad pathai khubor ka Morocco ki la ong ba une u dei u jumai uba heh duh uba la wan syllad ia ka Ri haduh mynta.
Ha u snem 2004, haduh 628 ngut ki briew kila iap bad 926 ngut kila mynsaw na ka jingkhynniuh u jumai uba la syllad ia ka Shnong Al Hoceima kaba don sha ki bynta ba Shatei Lam Mihngi ka Morocco.
