Guwahati, Jylliew 16 : Hadien ka jingther u slap ha kine ki arsngi bala leit noh, palat 29000 ngut ki briew kila shah ktah ha ka jingshlei um ha ki lai tylli ki District ka Assam.
Kat kum ka jingkhein bala ai da ki bor District, ka Lakhimpur ka dei kaba shah ktah jur eh bad haduh 23,500 ngut ki briew kila shah ktah, bud sa ka Dibrugarh kaba don haduh 3800 ngut kiba shah ktah bad ka Dhemaji kaba don kumba 1500 ki briew kiba shah ktah.
Ha kajuh ka por, ki bor pyniaid ka District kila pynkhreh ia lai tylli ki jaka sam marbam ia ki lanot shlei um ha Lakhimpur District.
Ki heh Ophisar ka SDMA kila pyntip ba ia mynta, haduh 25 tylli ki Shnong kila ngam shapoh um bad haduh 215.57 hectare ki ma rep kila shah pynjulor ha kylleng ki jaka ka Assam.
Nalor kane, kiba bun ruh ki surok, ki jingkieng bad ki rud wah kila shah pynjulor ha ka umsaw ha Lakhimpur, Goalpara, Biswanath, Dhemaji, Baksa, Dima Hasao bad Karimganj District.
Ki pyntip ba ia mynta hi, ki wah kim pat poi ha ka kyrdan ba don jingma ha kylleng ki jaka ka Assam.
Ha ka sngi Balang,ka Regional Meteorological Centre (RMC) Guwahati, kala batai lypa ba kan sa don ka jingther jong u slap ba jur ha baroh ki Jylla ka thain Shatei Lam Mihngi ka Ri ha kine ki san sngi ban wan.
Pule lang ia kane: Syllad ka umsaw ha North Sikkim, shah taplup ka surok NH-10 ha Pegong
