Shillong, Naitung 22 : Ka sngi ba-ar jong ka State-Level Subroto Mukherjee Cup 2026, kala shongshit da ka jingiathep kol bad ki hattrick ha ki jingiakhun jong ki skul na baroh ki 11 District ha ka U-15 boys, U-17 Boys bad U-17 Girls hynne ka sngi Balang.
Ia kane ka lympung la pynialehkai ha madan SSA Stadium, MFA Turf bad ka Mawlai Madan Heh bad la pyniaid ia ka da ka Tnad Sports & Youth Affairs ka Jylla kum shibynta ban jied ia ka kynhun na Jylla ka ban mihkhmat sha ka National Level.
Ha ka jingiakhun ki U-15 Boys ha Polo, ka Step by Step sec school na East Jaintia Hills kala jop da 5-1 kol pyrshah ia ka St.Claret na West Garo Hills ha kaba u heprit Mewasolaki Rymbai ula ioh ban thep arkol tang ha ka por ba lyngkot.
Ka North Liberty na West Jaintia Hills kala pynliem ia ka Anderson na West Khasi Hills da 4-0 kol, katba ka Umpohliew Jingtip na East Khasi Hills kala thep bun kol eh ha kane ka sngi ha ka group da ka jingthep 6-0 kol pyrshah ia ka South Garo Hills, Baghmara.
Ka skul Little Star na Eastern West Khasi Hills bad ka Mangsang na East Garo Hills kila iakhaid da mar 2-2 kol.
Ha ki jingiakhun ki U-17 Boys ha MFA Turf, ka Bajengdoba, North Garo Hills kala pynliem ia ka Amwi na West Jaintia Hills da 4-3 kol, khublei ia ki artylli ki kol na u Chukam R Marak.
Ka Wapung Sec School, East Jaintia Hills kala jop suk ha ka jingiakhun pyrshah ia ka Okkapara na South West Garo Hills da 4-0 kol ha kaba u samla Jeffarson Phawa ula ioh thep hat-trick.
Ka Mynken Christian, Ri-Bhoi kala pynliem ia ka Little Star na Eastern West Khasi Hills da 5-1 kol bad u Chanjib Chetry ula ioh ban thep haduh 4 kol marwei.
Ka Dapboklang Giri Memorial, West Khasi Hills kala pynbam ia ka Balang Mawlangwir, South West Khasi da 6-0 kol bad u samla Iohborlang Lyngkhoi ula ioh ban thep 4 kol marwei.
Ha ki jingiakhun U-17 Girls ha Mawlai, ka North Liberty, West Jaintia Jills kala jop kput ia ka St Claret na Soth West Garo Hills da kaba pynliem haduh 12 kol ha kaba ka samla Elizabeth Thianglai bad Baiarbha Nongrum kila ioh thep hat-trick.
Ka Lurmangkara, West Khasi Hills kala pynliem ia ka Montford, West Garo Hills da 4-0 kol bad ka samla Natasha Kharjahrin kala ioh thep hat-trick katba ka Tyrsad, East Khasi Hills kala pynliem ia ka Rangku Memorial, South Garo Hills da 9-0 kol ha kaba ka samla Ha-I-Sha Myrthong kala ioh hat-trick.
Ka Lotus, East Jaintia Hills bad ka Rangthong Christian, South West Khasi Hills kila kut ha ka jingiakhaid ba mar 0-0 kol.
Da ka jingiakhun jong ka group stage kan kut noh lashai ka sngi, ka jingphaikhmat mynta kan long sha ka semi-final ka ban long ha ka 24 tarik Naitung.
