Nongpoh, Naitung 22 : Kawei ka trok kit khaw jong ka FCI ba don u nombor AS01-FC-8674 kala kem ding kynsan kynsan ha ka janmiet sngi Ba-ar hapoh ka surok Umsning By-pass, Ri-Bhoi District.
Kane ka trok ka dei kaba niah da u Farijul Hoque bad kaba kit ia u khaw FCI.
Kat kum ka khubor Pulit, kane ka jingjia kala jia ha ka por 5:30 baje janmiet katba kane ka trok ka dang don ha lynti ban pynpoi ia u khaw FCI sha Jowai. La suba jur ba kane ka jingkem ding ka lah ban dei na ka waiar bording ka kali.
Mar syn ioh jingtip, ki Pulit ka Umiam Fire & Emergency Service kila hiar sha katei ka jaka bad kila lah ban tem ia ka ding.
Watla ka jingjulor ka long kaba la jubor bha hynrei donbok ba ym shym la don kano kano ka jingjia kaba sngewsih.
