Shillong, Naitung 22: Ka Estimate Committee jong ka Assembly ha ka sngi Balang, kala leit jurip ia 3 tylli ki projek ha ka Shillong kiba kynthup ia ka Pohkseh Water Supply Scheme, New Shillong Water Supply Scheme ha Mawpdang bad 2nd IT Park Building ha Shillong Technology Campus.
Ia kane ka jingjurip la ialam da u Chairman ka Estimate Committee u Bah Mayralborn Syiem, ki dkhot ka Committee kiba kynthup ia ka Miani D. Shira, Renikton Lyngdoh Tongkhar bad u Remington G. Momin.
Ki ophisar jong ka Assembly Secretariat, ka Tnad Public Health Engineering bad na ka Tnad Information Technology ruh kila ia donlang.
Ha Pohkseh, ka Committee kala khmih bniah ia ka jinglong jingman ka projek sam umbam bad u Bah Syiem ula ong ba ka Pumping System ha katei ka jaka kala khyllem noh ha kine ki khyndiat snem bad la wan ban pyntip sha ka Committee halor kane.
“Kane kaj ingjia ka long kaba sngewsih. Kam dei ka jingbakla ka jongno jongno ruh. Ngi lah bthah ia ka tnad ba kan ithuh noh da kawei pat ka jaka kaba thymmai na ka bynta katei ka scheme” ula ong.
Ula pynpaw ia ka jingkyrmen ba ka Tnad PHE kan pynkhreh noh mardor ia ka jingshna thymmai ia ka bhah tyngka.
U Bah Syiem ula ai khublei ruh ia ka Dorbar Shnong Pohkseh kaba la ai jaka na ka bynta katei ka projek bad ong ba ka kam kan sa sdang noh, shisien ba lah ioh ia ka jaka kaba thymmai ban pynthikna ba ka umbam umdih kaba shngain kan poi sha ki longiing kiba don ha katei ka thain.
Ka Committee kala leit ruh ban jurip ia ka New Shillong Water Supply Scheme ha Mawpdang, ha kaba ki ophisar ka PHE kila pyntip ba la dep ban buh lypa ia ki jingdonkam kynthup ia ka Treatment Plant bad kiwei kiwei ki jingtei kiba donkam.
U Bah Syiem ula ong, ba ki jingtrei ia ki kam ki jam baroh halor katei ka projek ka long kaba sngewhun.
“Kane ka projek kadei kaba iaid beit. Lah pyntip ia ngi ba ha ka Phase 1 kaba kynthup ia ka Dam, Main Gravity Line bad ka Treatment Plant yn sa pyntreikam noh bad yn sa pyndep pura noh ha u bnai nohprah 2027” ula ong.
Ula bynrap ba ha ka Phase 2 yn pynleit jingmut ha ka jingsam ia ka um sha ki shnong ki bapher bapher ha New Shillong bad ula pynpaw ia ka jingskhem jingmut ba ia kane ka projek yn pyndep ha ka por kaba la buh.
Hadien kane, ka Committee kala leit ban jurip ia ka 2nd IT Park Building kaba don ha Shillong Technology Campus.
U Bah Syiem ula ong, ba ka Committee kala sngewhun ia ka jingiaid shakhmat watla ka Tnad IT kala mad ia ki jingeh. Baroh ar ki kam kiba iadei bad ka jingtrei bad ka jingpyndonkam ia ka pisa ha ka jingtei ia ka building ka long kaba sngewhun.
Ula pynpaw ba kane ka jingtei kaba thymami jong ka IT kadei kaba la khmih lynti ba kan thaw ia ki kabu ban aikam aijam ia ki samla ka jylla bad ban kyrshan ia ka roi jong ka IT ha Meghalaya.
Ka Estimate Committee ka iengskhem ha ka jingkut jingmut ban khmih bniah ia ki projek kiba kongsan jong ki paitbah ban pynthikna ba dei ban pyndep ia ki ha ka pork aba la buh bad ban pyndonkam pura ia kine ki jingdon jingem na ka bynta ka jingmyntoi jong ki paitbah.
