Shillong, Naitung 09 : Uwei u samla Garo ba shah kem ha ki Pulit Assam, la suba ba ula shah pyniap tohmet hapoh ka New Life Foundation Centre, kaba don ha Nayapara, Goalpara, Assam.
Une u samla Garo u kyrteng u Niksamseng Ch Marak, uba shah kem ha ki Pulit ka Assam ha ka 2 tarik Naitung 2024.
U Myntri Rangbah ka Jylla Conrad K Sangma, haba ioh jingtip ia kane ka jingjia, ula thoh da ka shithi sha u Myntri Rangbah ka Assam Himanta Biswa Sarma, ba dawa ba dei ban thung ia ka jingtohkit bad ban leh eiei halor kane ka jingjia.
Kat kum kane ka shithi, u Conrad ula pyntip ba ki Pulit hadien ba ki kem ia u Niksamseng, kila phah ia u sha Rehabilitation Centre kaba don ha Goalpara, Assam. Hynrei tang arsngi ba u don ha kane ka Centre, la lap ia u ba ula iap hapoh ka Centre ha ka rukom kaba ipher bha.
U Conrad u pyntip ba kat kum ka jingpyntip ki bahaiing hasem, ki bor pyniaid kane ka Centre haba nyngkong, kila kam b aka dei ka kam bthat jubor iala ka jingim hynrei hadien kila kylla ktien ia kane, kaba pynartatien shibun ia kaei kaba jia ia une u samla.
“La pyntip sha nga ba ka met ka don ia ki dak mong ba jur bha, kynthup ki dak ot tari na ka ngap ka diang, ka dak iing, ka dak mong na ka tmoh, na syngkai bad ki kjat” ula pyntip ha ka shithi.
U Conrad ula ong ba kine ki dak ki pynpaw ba u Niksamseng ula shah pynshitom tohmet bha, shah shoh bad shah dung hapoh kane ka Rehab Centre.
U Conrad u ong ba halor kine kiei kiei baroh, ula kyrpad ban tohkit mardor ia ka jingjia, kaba dei ruh ka jingkwah jong ki bahaiing hasem ban ioh ia ka jingbishar kaba hok.
Ula pyntip ba ki bahaiing kila ujor ia ka ejahar halor kane ka jingjia.
La kem ia 7 ngut kiba suba donkti
Halor ka jingujor jong ka Achik State People’s Front (ASPF) bad Garo Jatiya Parishad (GJP), ki Pulit kila register case hapoh ka kyndon 103(1)/238-3(5) jong ka Bharatiya Nyaya Sanhita (BNS) halor kane ka jingjia bad kila kem ruh ia 7 ngut ki briew ba suba donkti.
U care taker jong ka rehab, Jintu Chakravorty (24) khun jong u Abinash Chakravorty, ba na Paikan kaba hap hapoh ka Krishnai Police Station, Goalpara, ula shah kynnoh kum uba hakhmat eh bad ula don mynta hapoh ka Police custody na ka bynta ka jingtohkit kaba bniah.
Kiwei pat kiba la shah kem ki kynthup ia u Prasenjit Nath (23), Hanif Ali (28), Dhanmaina Banikya (38, Mohsen Khanbad u Kunal Das (23).
Uwei u khynnah ruh ula shah kem halor kane ka jingjia bad la kit ia u sha Juvenile centre ha Goalpara. Nalor kine, sa uwei u briew uba mynsaw, uba dang shah sumar ha Goalpara Civil Hospital, ula shah kem. La iathuh ba sa arngut ki briew ki dang phetrieh.
