Nongpoh, Risaw 20 : Ki Pulit ka Umiam Police Station hynne ka janmiet kila pynlong ia ka jingwad metiap ha Jingkieng Damsite namar ka jingsuba nohiap jong uwei u Nongniah taxi kamai, uba la jah rngai hadien ka jingpynieng khlem akor ia ka kali hapdeng jong ka jingkieng.
Kane ka taxi kamai ka dei kaba don u nombor ML05-Y-7753, ong ki Pulit kiba la khot ia ka kynhun ki State Rescue Team bad ki Fire Emergency Service na Umiam bad wad ia ka met jong une u nongniah.
Ki Pulit ki iathuh, hynne ka janmiet kila ioh khubor ia ka jingdon jong kawei ka taxi kamai ba pynieng khlem akor hapdeng jong ka Jingkieng Damsite, kaba la pynthut ia ka jingiaid beit iaid ryntih jong ki kali na kane ka jiengkieng. Ki iathuh baka kynhun pulit mar mar kala hiar sha kane ka jaka hynrei kila lap tang ia ka kali bad u shabi katba ia u briew ym shym la lapdien satia.
Ki Pulit ki iathuh ba ha ka jingtohkit bniah, ki Pulit kila lap sa ia kawei ka jaket rangbah bad ka mobile narud jong ka jingkieng Damsite, kaba la nang pynsuba jur ba lah ban dei ka kam nohiap.
Ka kynhun ki Pulit bad ka State Rescue Team kila iawad ia ka metiap baroh shisngi hynrei tad haduh ba thoh ia kane ka khubor, ki Pulit kim pat lap eiei bad ym pat lah ruh ban pynthikna la une u nongniah jong kane ka taxi kamai ula nohiap ne ula shu ieh jyndat ia ka kali bad phet ialade.
Ki Pulit ki pyntip ba ka jingwad ia ka met kan dang iai bteng lashai ka sngi.
