Shillong, Jul 22: Ka Laitkor SC bad ka Mawlai SC kila rung sha ka Phainal jong ka Shillong Sports Association’s Women’s League 2023 hadien ba kila jop hynne ka sngi Saitjain, iaka jingiakhun iaka semi phainal kaba la long ha SSA Stadium ha First Ground, Polo.
Ha u snem 2022 ka Laitkor SC kala iakhun pyrshah ia ka Mawlai SC ha ka Phainal bad ka Mawlai kala jop ha ka Extra Time da 2-1 bad mynta u snem ruh kine kijuh hi ki kynhun kin iakhun biang iaka phainal jongka SSA Women’s League 2023.
Haba phai sha ka jingiakhun iaka semi phainal, ka Laitkor kala pynliem iaka Lumparing da 4-1.
Ka Catherine Kharkongor kala ioh ban thep iaka kol naka bynta ka Lumparing ha ka minit kaba 15 hynrei hadien kane ka Laitkor kala ialehkai tyngeh bad hashwa ban kut ka kylla step haka minit kaba (35’+2) ka Iaraplang Nongrum kala thep ia ka kol kaba itynnad da ka ‘bicycle kick’.
Ka Laitkor kala bteng ban ialehkai bha ha ka kylla miet bad ka Iaraplang kala ioh ban thep iaka kol Baar ha ka minit kaba 55 bad 5 minit hadien kane ka Saralin Warlarpih kala ioh ban thep iaka kol bad haka minit kaba 64 ka Iaraplang kala ioh ban thep kol biang bad ioh syndon iaka hat-trick bad ka Iaraplang kala ioh ruh iaka nam Player of the Match.
Ka jingiakhun hapdeng ka Mawlai bad ka PFR Football Academy kala kut haka jingiakhiad da 1-1 hynrei dei ha ka Penalty Shootout ba ka Mawlai kala jop iaka PFR da 4-2.
Ka Marbarin Nongrum kala thep iaka kol haka minit kaba 19 naka bynta ka Mawlai hynrei haka minit kaba 22 ka PFR kala ioh ban pynphai kylla da ka jingthep kol ka Betsheba Kharsyntiew.
Hadien ba kane ka jingiakhun kala kut noh haka jingiakhaid, kumta la pynlong noh da ka Penalty Shootout ha kaba ka Mawlai kala ioh ban thep 4 kol katba ka PFR kala lah ban thep tang 2 Kol. Ka Marbarin kala ioh ia ka nam Player of the Match.
Ka Phainal jong ka Women’s League hapdeng ka Mawlai bad ka Laitkor kan long ha ka 29 tarik u Naitung ha SSA Stadium ha ka por 3:30 mynsngi.
Pule ruh: Ioh pyllait ka KSU ia 2 ngut ki Khynnah ap masi ba jan shah rahbor ha ki paid Karbi
