Shillong, Naiwieng 12: Sa shisien pat ka Rangdajied United FC bad ka Shillong Lajong FC, kin iakhun mar pyrshah naka bynta ban iakneh rah ia ka nam lahduh ka SSA Super Cup 2025 ba nyngkong eh bala pyniaid da ka Shillong Sports Association, ka ban long lashai ka sngi Palei ha madan First Ground, Polo.
Ha kane ka jingiakhun, u Myntri rangbah ka jylla Conrad K Sangma, ryngkat u Myntri ka tnat Sports & Youth Affairs bah Wailadmiki Shylla ba kin wan ba kin ia sakhi lang ia kane ka jingiakhun.
Kum ki klob, kine ki ar kynhun, ki la ju iakhun bad ia aireng hapdeng maki la bun bunsien, naduh ki kyrdan iakhun ki samla ba dang shu khie shu san haduh ka kyrdan iakhun ka Shillong Premier League, Meghalaya State League, Durand Cup ne wat haduh ka I-League.
Pynban kaba kut ka namjop hapdeng jong kine ki jingiakhun hapdeng kine ki ar kynhun, ka la leit sha ka kynhun ialehkai ka SLFC, hadien ba ka la lah ba kan jop ha ka jingiakhun ka SPL ha u 2024, nangta ha ka Durand Cup bad kumjuh ha ka MSL, hynrei lait noh pat mynta ka snem, ka jingiakhun hapdeng kine ki ar kynhun ka la kut noh ha ka SPL hadien ba la lah tang ban shu iakhaid da 0-0.
Ha kane ka samoi ialehkai ba mynta., ka RUFC ka la lah ba kan bat ia ka kyrdan ba 6 ha ka miej iakhein point jong ka SPL, hynrei ka la lah pat ba kan jam sha ka phainal jong ka Super Cup ka wan hadien ka jingjop kaba long da 2-0 pyrshah ia ka Langsning FC ha ka jingiakhun ia ka semifinal, ha kaba kine ki artylli ki kol, la thep ia ki da u Stephanson Pale, katba na ka liang ka SLFC, ka la jam sha ka phainal hadien ka jingjop kaba long tang da 1-0 ia ka Mawlai SC.
Khyndiat kaba kham itynnad bad kaba donkam ban pyrto hangne ka long ba ki khynnah ka RUFC, ki la lah ban kiew bad paw bha katba nang iaid shakhmat ka samoi ialehkai mynta ka snem, kampher ba ha ka por kaba sdang jong ka SPL, ki la shem jingeh ban ialehkai bha.
Ha ka por ka jingiakhun ia ka play-off pyrshah ia ka Nangkiew Irat, ka jingjop kaba long da 3-0 bad ban jop pat sa ia ka Langsning FC ka kynhun ba rah ia ka nam lahduh ka SPL mynta ka snem, ka pynkyndit bynriew ia baroh.
Haba phai sha ka SLFC, ha ka jingiakhun pyrshah ia ka Mawlai ha ka semifinal, khyndiat ka kham I hiar ka rukom ialehkai, hynrei u Wanteilang Malngiang, u la lah ban ieng ap bha ia ka kol ba un nym shym la shah thep satia wat tang shi kol ruh na ki hynriew sien ialehkai ba kynthup naduh ka SPL bad ka Super Cup, hynrei shakhmat, kum ka kynhun, ka SLFC ka da shem jingeh bad kam lah ban shna pynwandur ia ki bol ban pynurlong sha ki kol, bad dei kane ka jingeh kaba pynlong ia ki wat ban duh ia ka kabu ksiar ban rah wat ia ka nam lahduh ha ka SPL.
Kumta, ka phainal ka Super Cup kan nym kut tang ha ka jingiakhun hapdeng kine ki ar kynhun, hynrei yn sakhi ruh ia ka jingsdang ban mihpaw sa shi kynhun ki khynnah ialehkai kiban long ka lawei bad ka jingkyrmen ia ka jylla.
