Shillong, Naiwieng 12 : Ka Congress kam khein kor satia ia ka jingmih ka kynhun iatreilang ki seng riewlum ha ka thain Shatei Lam Mihngi haba pynpaw ba ka jingtyrwa ban pynkha ia ka Unified Regional Front da ka National People’s Party (NPP) bad kiwei ki Seng sain pyrthei kam buh jingma eiei ruh em ia ka Congress.
Haba kren sha ki lad pathai khubor ha ka sngi Balang, u Secretary ka Meghalaya Pradesh Congress Committee (MPCC) Bah Manuel Badwar ula ong ba kam don jingma eiei ruh em ia ka party.
Ula kynnoh ba kane ka sienjam ka pyni ia ka jingpulom ha ka jingtreikam na ka liang ka BJP bad ong “Bun na ki seng riewlum kila sngewthuh ba kin ym poi shano shano ruh da kaba ialong paralok bad ka BJP bad namar kane ki sngew ba ki hap ban thaw ia ka Front ba thymmai. La kane ka Front ba thymmai ka dei kaba bha ne ba sniew, ka histori kan sa rai, ym ma ngi”.
Halor ka jingpynjngai ba kumjuh jong ki seng riewlum ka NE ia ka Congress bad BJP, u Bah Badwar ula ong ba kane ka dei ka nongrim treikam jong ki ba kumno ki kwah ban trei ia ki kam.
“Ia mynta hi, nga sngew ba kane kam dei ka jingthmu kaba bha….lada phi kwah ban seng sain pyrthei ba thymmai, phin hap pynlut bun bah ka pisa, ia kaba bun kan wan na Meghalaya bad ngam tharai ba ki paidbah ba bun balang kin pdiang ia kata” ula ong.
 bad kiwei ki Seng sain pyrthei kam buh jingma eiei ruh em ia ka Congress.){kind=link}