SPL | Pynliem ka Shillong Lajong da 4-0 kol ia ka Sawmer

Shillong, Risaw 06: Ka kynhun ialehkai jong ka Sawmer ka la shah rem da 4-0 hakhmat ka Shillong Lajong FC (kaba bat ruh ia ka nam kum ka lahduh) ha ka lympung ialehkai jong ka Shillong Premier League, kaba long ha ka sngi Nyngkong ha SSA Stadium, First Ground, Polo.

Ia kine ki kol ka Shillong Lajong FC ban khur artad ia ka lai point ba pura ka jong ka, la thep ia ki da u  Banlamkupar Rynjah (45’+3), Emanbha Marbaniang (67’), Iohborlang L Lyngkhoi (71’) bad Franky Dkhar (84’), kaba pynlong syndon ia ka ba kan ioh ba kan khur 15 point, mar ia ryngkat bad ka Mawlai.

Haba phai sha ka jingiakhun, ka sur ialehkai ka kynhun ka Sawmer ka long ba kan kham ialehkai shadien da bad phikir, da kaba pynshong nongrim bha ia la ka jong ka jingkhlain bad tlot ha la ka jong ka kynhun.

Hynrei ha ka minit ba 20 u  Jeffrey Jyrwa u la lah ban kyrda ia ka freekick kaba la khyrwit lyngba u Iohborlang, pynban shwa ba ka jingiakhun kan jam sha ka jingiashong thait ba u Banlamkupar u la ioh ia  ka kabu ban pynkhih ia ka jar naka bynta ka Shillong Lajong.

Haba wan ban bteng ia ka kylla miet, ki khynnah ka Lajong ki la sdang ban kham pynsted bad tehlakam bha ia ka jingiakhun, da kaba ki la sdang ban kham ñion bha ia ka kut ialehkai ka Sawmer, kaba hangne, u rangap kol ka Sawmer u la ieng  iada ia la ka jong ka kol, hynrei hapdeng ka jingshah iai ñion kaba na ka por sha ka por, ka plie lad ia ka Lajong ba kan bteng ba kan ioh pat ba kan thep sa ia ki kol kiba sah ki jong ka.

Haba phai sha ka kynhun ialehkai ka Sawmer, ka sngewthuh ba kam long kaba suk ia ka ha kane ka jingiakhun pyrshah ia ka Lajong, pynban kaei kaba ka lah ba kan pynpaw hi ka long tang ba kan shu kham lah pat ban kham iakhun ne ialehkai bha bad kiwei pat ki kynhun kiba lam ia ryngkat bor lang bad ka, kaba da kane ka nam rem kaba mynta ka sngi, tden kan iai neh ha ka kyrdan kaba san hadien ba ka la ioh ba kan khur 9 point.

Lashai pat ka sngi, kan dei kawei na ki jingiakhun kaban itynnad bad kaba iakhaid bha khamtam lei lei ha ka jingiaknieh ia ka nam lahduh kan long hapdeng ka Nangkiew Irat SC pyrshah ia ka Langsning FC, kaba na kane ka jingiakhun wat ka kynhun ka Shillong Lajong ne ka Mawlai kin peit ia kaei kaban jia bad kaban mih na kane ka jingiakhun.

Ka Nangkiew Irat kan rung sha kane ka jingiakhun hadien ba ka la ioh ba kn khur 13 point, katba ka Langsning FC ka don ha ka kyrdan kaba saw hadien ba ka la ioh ba kan khur 11 point, kane ka jingiakhun kan sdang ha ka por 4:30 nohphai sngi.