Shillong, Nailur 26: Ka kynhun ialehkai ka Sawmer SC ka la lah ba kan khur ia ka jingjop kaba pynhun hi jrut ia ka bad kane ka la wan hadien ba ka la lah ba kan pynliem ia ka Mylliem SC da 3-0, ha ka jingiakhun ka lympung ialehkai Shillong Premier League 2025, ka Shillong Sports Association, kaba la long hynne ka nohphai sngi ha SSA Stadium, First Ground, Polo.
U namtam ha kane ka jingiakhun dei u Michaelson Kurbah uba la lah ban lam khmat ia ka Sawmer SC ban thep haduh ar kol (38′, 54′) bad sa shi kol la ioh ban thep ia ka da u Khainkupar Iawphniaw (77).
Da kane ka jingjop, ka Sawmer SC joit kan kiew mynta sha ka kyrdan kaba saw na ka kyrdan kaba phra ba ka la don baroh shi katta hadien ba ka la ioh ba kan khur 9 point. Katba ka kynhun ialehkai ka Mylliem SC kan sahkut hi tden ha u line saw (relegation zone) hadien ba ka don ha ka kyrdan kaba 9 bad ba ka la lah ban ioh khur tang 5 point.
Haba phai sha ka jingiakhun, lah ban ong ba ka la sdang suki bha, hadien ba ki ar kynhun ki la shu ia swar shwa ia ka jingtlot ki jingduna ki jong ki, khlem da ñion ia la ka rukom ialehkai ban ban ioh pynkhih ia ka jar.
Pynban ki kabu ksiar ba kham paw shyna ka la wan ba kan mih pw hadien ba u Alem Khongwir u la ioh ban rah shakhmat ia ka bol bad ban khyrwit jam bha ia ka kaba shu lait salit ban pynkhih ia ka jar ka Sawmer, sha shilliang pat, ka kabu ksiar ka mih paw na u Khrawkupar Tamu ba khlem don mano mano ban khanglad ia u bad ba u la ioh ban head ia ka bol kaba lait beit shabar ka kol.
Haba wan ban bteng ia ka kylla miet, ka Sawmer SC ka la wanrah ia kawei ka jingkylla ha la ka kynhun ha kaba ka la rai ban pynmih madan noh da u Khainkupar, uba lehse lah ban ong ba u long uwei na ki rang ialehkai uba da ksaw bha naka bynta ka kynhun, tad haduh ba un da iarap ban thep ia ka kol kaba lai, kaba dei artad ka kol kaba saw kaba un ioh ban thep ha kane ka samoi ialehkai ba mynta bad ba un tbeh sha ka thong ban iakhun ia ka nam top scorer kham hadien ki arngut kiwei pat ki player kum u Himanshu Patil bad Loving Suting ka Nangkiew Irat bad ka Mawlai SC, kiba la ioh ban thep mar san kol.
Kane ka namrem, kam lah ban khlem da pyndiaw mynsiem ia ki paid nongkyrshan ka Mylliem, kampher wat hadien ba ki la shem bad iohi ba kum ka kynhun kam da dei than eh kaba tlot ne sniew ka rukom ialehkai ka jong ka, hynrei lada yn ia phai pat sha ka kynhun ialehkai ka Sawmer SC, kane ka dei ka namjop kaba arsien lynter ia ka bad ba ka khlem pat shim la shah pynphai wat tang kawei ruh ka kol naduh ba la wan ban ap ia ka da u Jeffrey G Jyrwa.
