Shillong, Nailur 25: Ka jingiakhun hapdeng ka Rangdajied United FC bad ka Laitkor SC ha ka lympung ialehkai jong ka Shillong Premier League 2025, ka Shillong Sports Association, ka la kut noh ha ka jingiakhaid kaba long da mar ar kol, ha ka jingiakhun hynne ka sngi Palei ha SSA Stadium, First ground Polo.
Ha ka jingshisha, ki ar kynhun haba ki la wan ban mih madan, ki la rung artad bad ka mynsiem ba long katba ka long ban wanphai napdeng ka madan iakhun ryngkat bad ka jingjop, pynban ha kaba kut jong ka sngi, na ka daw ka jingbym lah than ban pyndonkam ia ki kabu ksiar ba la wan sha kine ki ar kynhun, ha kaba kut kim banse ban shu ia hun ban shu ia sam noh mar shi point.
Haba phai sha ka jingiakhun, dei ka Rangdajied kaba la ioh ban pynkhih nyngkong ia ka jar kaba la wan lyngba u Menangpyndap Khongjee (25’), hadien ba u la ioh ban shut kham jam bha ia ka bol nabar ka box.
Pynban ha shwa ba kane ka jingiakhun kan jam sha ka jingiashongthait ba shipor, ka Laitkor SC lyngba u Fridison Wanniang ka la ioh ia ka kabu ksiar ba kan pynphai kylla noh ia kane ka shi kol (45’+2), kaba pynlong ia ki nongwan peitkai ba kin nym khih na ka jaka kaba ki shong hynrei ban ap pat kmang sa kaei kaban wan ban jia ha ka kylla miet.
Haba la wan ban bteng biang ia ka kylla kaba ar, ka kynhun ialehkai jong ka Laitkor SC lyngba u Giovanni Syiemiong (61’) ka la lah ba kan tam kylla shakhmat , ha kaba kane ka kol ba une u player u la thep ka la wan kham na kyndong bha.
Ka jinglah ka Laitkor SC ban tam shakhmat ka la pynlong ia ka kynhun ialehkai ka Rangdajied United FC ba kin pyrshang katba lah ban wanphai biang sha ka lynti jong ka jingiakhun, hynrei hapdeng jong kane, la shem bad iohi ba kum ka kynhun ka la pynlehnohei de ruh ia ki kato katne ki kabu ksiar kiba la wan sha ka, hynrei dei tad ha ka minit kaba 84 ba Denelson Pyngrope, u la ioh ia ka kabu ban pynkhih ia ka jar bad kaba la biang pura ia ka kynhun hi baroh kawei ba shipor na tmier jong ka namrem ba kan lait hi war bad ban lah ban pyniakhaid ia kane ka jingiakhun.
