Shillong, Naitung 30: Ka Mawlai ka la pynliem ia ka Laitkor ha ka jingiakhun jong ka lympung Shillong Premier League 2026 da ka jingthep haduh 5-0 kol ha madan ialehkai SSA hangne mynta ka sngi.
Ha ka jingjop kaba heh tam ha kane ka samoi ïalehkai, ka Mawlai kaba la jop arsien kum ka champion, ka la ïoh thep ia ki kol lyngba u Samlang Rympei (49’), u Fairming Suting (52’), u Wadshwa Latoo (55’), u Basuklang Bina (71’) bad u Bajiedlang Rangslang (86’).
Ka jingïalehkai haka kylla step kala sakhi ia ka jingiakhaid khlem da don kiba ioh ban pynkhih jar, kaba la pynlong ïa baroh ha madan ban pyrkhat ba kane kan dei kawei pat ka jingïalehkai kaba itynnad bha jong ka SPL 2026.
Ki rang ïalehkai ka Mawlai ki la ïoh ïa ka buit ba kordor na u coach Bah Hering Shangpliang bad kila pynpra ia ki nongialehkai ba shadien jong ka Laitkor ha man ki khep, da ka jingai bol kaba thikna bad ka jingpas bol kaba stad.
Baroh ka la sdang naduh ba u Jestibor Mawlong u la ïoh ïa ka bol kaba la shut da u nongap kol ka Laitkor, u Deranius Wahlang hapoh shi minit na ka jingsdang biang ka kylla miet bad u Damangbhalang Chyne u la ioh ban pynkhih ïa ka jar.
Na ka liang jong ka, ka Laitkor ka la pyrshang ban pynkhlaiñ ïa ka jingiakhun bad ka la ïoh ban thep artylli ki kol ha ka kylla miet hynrei kine kim shym la buh jingma satia ïa u nongap kol ka Mawlai u Lambhamiki Lamare.
Ka jingïakhun ban wan ha ka SPL kan long ha ka 4 tarik u Nailur hapdeng ka Sawmer pyrshah ïa ka Rangdajied United ha ka por 4 baje janmiet.
Ka Sawmer ka la shah rem ha ka jingïakhun nyngkong jong u snem 2026 da 1-0 ha ka Langsning kaba dang ïakhun ïa ka nam lahduh, katba ka Rangdajied ka la shah pynïakhaid ha ka jingïakhun ba nyngkong jong ka da kaba ïakhaid noh da 1-1 bad ka Meghalaya Police.
