Shillong, Naitung 30: Hapdeng ka jingpyrshah bad ka jingpyndonkam ki Pulit ia ka lyer sat khmat hashwa ban pynlong ia ka Public Hearing ka Shree Cement Ltd, u Symbud Myntri Rangbah ka Jylla Bah Prestone Tynsong ha ka sngi Palei ula ong, ba ka jingphaikhmat jong ka sorkar ka long ban pynneh ia ka shongsuk shongsain haba ailad ia ka hearing ba kan iaid shakhmat kat kum ka ain.
U Bah Tynsong ula pyntip ba ula bthah ia ki bor pyniaid district ba kin leh ia kaba dei bad ban phikir bha.
“Ha ka jingshisha ngi lah dep bthah ia ki bor district ba kin shimkhia bha halor katei ka mat bad ban leh bha jai. To ngin sa ia peit” ula ong.
“Ia mynta hi, ngam pat lah ban ong eiei hynrei to ngin sa ia peit namar ba ngi lah dep ban bthah da kaba shai ia u Deputy Commissioner bad Superintendent”.
U Myntri ula jubab ia ki jingkylli ba balei ia ka Hearing la pynlong watla ki liang pyrshah kila ong ba ka jingpynpaw jong ki paidbah kadei kaba la mih ka jingiapait ne ia phiah ha kaba iadei bad katei ka projek.
“Nga tharai, lada phi pule tang na kawei ka sla kan long kumta. Lada phi leit pat ha ka sla ka baar, kala don ruh ka jingdawa kaba jur ba dei beit ban iaid shakhmat. Kam dei satia tang ka jingdawa ban pynduh noh hynrei kala don ruh ka jingdawa kaba jur ba dei ban iaid beit shakhmat” ula ong.
Ula banjur ba ka jingiada ia ka mariang kam dei kaba la rai ha ka kyrdan jong ka sorkar jylla hi marwei.
“Peit ka public hearing ka long kaba kongsan bha. Kumta kadei tang lyngba kane ka hearing kaba phin lah ban rai ia kiei kiei. Namar kumba nga lah ong, ki don ki briew kiba ju kren teng teng ia ki mat kiba iadei bad ka mariang. Ngi ruh ngi don ia ka jingsngewkhia halor katei ka mat. Ha kajuh ka por, ia ki mat ban iada ia ka mariang kam dei kaba la leh tang da ka Sorkar Jylla hynrei wat da ka Sorkar Pdeng ruh. Ka ain ka long kaba khlain bad kane ka ain ka long kaba shai kdar. Ngim lah ban pynkdor wat tang ia kawei ka kyndon ruh halor katei ka mat” ong u Bah Tynsong.
“Kumta lada phi kren shaphang ki mat kiba iadei bad ka mariang, baroh kiei kiei kila long ha ki jingthoh. Hap ban bud ryntih ia ki”.
U Bah Tynsong ula ai nuksa ruh ba kan don ka jingioh jingmyntoi ha ka ioh ka kot kumba la pynsngew da ki trai shnong jong ka East Jaintia Hills, ha kaba ki karkhana pynmih dewbilat kila treikam.
“Hadien kane, phi hap ban pdiang ia kawei ka mat kaba long kaba kongsan bad kata kadei ka mat jong ka ioh ka kot. Katei ruh ka don. Kata kadei kaba nga kren, ki paitbah ki kren ba ki donkam shuh shuh ia ki karkhana dewbilat ha East Jaintia Hills namar ba kila iohi ba bun ki karkhana dewbilat kila don ha katei ka jaka. Ngi lah iohi ia kata, wat ki committee jong ki shnong ki thaw ha kine ki khyndiat sngi kila ong ia nga, ba “Ki ioh bha ia ki jingmyntoi kiba bun na katei”.
“Ka kompani, Dorbar Shnong bad baroh ki iatrei lang bad kila noh synniang shibun ha ki prokram kam pynroi kiba la leh da ki bor pyniaid shnong”.
Halor ka jingiakhih bad ki jingkynnoh ba la pyndonkam palat ia ka bor, u Symbud Myntri Rangbah ula ong, ba yn sa khmih bniah ia ka kaiphod jong ki pulit.
“Kumta ka jingsngewkhia ka jong nga kadei halor ka shongsuk shongsain. Hynrei ngi lah dep ban bthah ia ki bor district ban shimkhia ia kane bad ban pynthikna ba dei ban pynneh ha kano kano ka rukom ia ka shongsuk shongsain”.
