Kohima, Naitung 30: Ka sorkar Nagaland ka dang pynjur ia ka jingiakhun pyrshah ia ka jingkhaii briew da kaba pynkhlain ia ki lad jingiarap, jingpynsngewthuh paidbah, da kaba pynleit jingmut ha kaba iada ia ki kynthei bad ki khynnah kiba rit, ong u Social Welfare Secretary bad AHoD u Limawabang Jamir.
Ha ka jingiakren, u Jamir u la ong ba ka tnad Social Welfare ka la buh ia ki lad ki lynti ban pynthikna ba ki nongshah khaii kin ioh ia ka jingiarap mardor bad kumjuh ruh ka rehabilitation kaba neh slem.
“Man kiba lait im ki dei hok ban ïoh ïa ka lad kaba ar,” u la ong, da kaba ban jur ba ka rehabilitation pat ka dang long ka tynrai jong ka jingpyrshang jong ka jylla ban pyrshah ïa ka jingkhaii briew.
U Jamir u la ïathuh ruh ba ka Child Helpline, ka Women Helpline-181 bad ka Sakhi One Stop Centre ki treikam ha kylleng ka jylla ban jubab ïa ki case kiba ïadei bad ki kynthei bad ki khynnah kiba don ha ka jingeh. Kiba lait im na ka jingshah khaii bad shah lehbein la ai jaka sah, ka counselling ne ka jingia syllok, jingiarap na ka ain bad jingkyrshan ban pynbha pat bad iarap ia ki ban tei pat ia ka jingim jong ki.
Haba pynpaw ïa ki jingsngewkhia halor ka jingshah pyntreikam ia ki khynnah ha ïing, ka jingshah lehbeiñ ha ka kam khaii bad ka jingshim khun be-aiñ, khamtam ha ki jaka ba jngai bad kiba jaka ba kyndong, u la ong ba ka tnad ka buh hakhmat eh ïa ki jingpynsngewthuh paidbah, ka jingithuh kloi ïa ki khynnah kiba don ha ka jingma bad ka jingïatreilang kaba jan bad ki bor synshar district, ki tnad pynjari aiñ bad ki tnad pynïaid ain nalor ki seng ha ka imlang ka sahlang.
Haba batai ia ka jingkhaii briew kum ka jingeh kaba iai bteng, u Jamir u la ong ba ka Nagaland ka dang iai bteng ban long kum ka tynrai, ka jaka iaid bad ka jaka poi jong ka jingkhaii briew.U la maham ba ki nongkhaii ki nang pyndonkam ïa ki jingkular lamler jong ki kam, ka jingpule bad ka jingshongkha ban pynngop ïa ki lanot, kaba pynlong ïa ka jingpeitngor jong ka imlang sahlang bad ka jingpynsngewthuh paidbah kaba kongsan bha.
U la ong ba ka tnad, ka dang ïatreilang bad ki pulit, ki bor synshar district, ki seng treimon sngewbha bad kiwei kiwei ki nongïashim bynta ban pynthikna ïa ki kam pyllait im ha ka por kaba biang, ban pynngat ha ka aiñ kaba thikna ïa ki nongkhaii bad ka jingpynbha pat ïa kiba lait im.U la ban jur ba ka jingïatreilang ka long kaba donkam ym tang ban pynthikna ïa ki jingshah rai pynrem hynrei ban ai ruh ïa ki nongshah pynïap ïa ka jingkyrshan kaba neh ha ka liang ka jingmut jingpyrkhat, ka aiñ bad ka kamai kajih.
U Jamir u la ong ba ki prokram pynsngewthuh paidbah ki ju pynlong man ka por ha ki skul, ki shnong ki thaw ban pynsngewthuh ia ki samla, ki kmie ki kpa bad ki nongialam shnong shaphang ki jingma kiba lah ban mih na ka jingkhaii briew, ka jingpyndonkam bakla online bad ka jingshim khun beain.
U la kubur ba ki jaka kiba eh, ki jaka sah kiba jngai, ka jingduna ka jingtip bad ki buit kiba nang kiew man ka por jong ka network kiba khaii briew ki dang bteng ban buh jingeh ha kaba pyntreikam. Hynrei u la ong ba ka sorkar ka dang pynkhlain ia ka jingiatreilang ha ki tnad treikam bad tei ia ka bor jong ki tnad ba hakhmat eh ban pynbha ia ka jingiada bad ka jingpynkhreh.
Ban iada na ka jingkhaii biang ia ki briew, la pyniadei ia kiba lait im bad ka jingai jingmut, ka jinghikai, ka jingpynroi ia ka sap bad ki lad kamai ban pynsuk ia ka jingrung biang jong ki sha ka imlang sahlang da kaba suk.
Haba kyrpad ïa ki paidbah ban ïashim bynta shitrhem, u Jamir u la kyntu ïa ki kmie ki kpa, ki nongïalam shnong bad ki samla ban long kiba husiar ïa ki jingtyrwa kam kiba suba, ki jingtyrwa shongkurim bad ki rukom shim khun be-aiñ. U la pynshlur ruh ïa ki nongshong shnong ban pyntip ïa ki jingsuba khaii briew lyngba ki helpline kiba don, da kaba ong ba ban pynduhjait ïa ka jingkhaii briew ka donkam ïa ka jingïatreilang na baroh ar ki tnad sorkar bad ka imlang sahlang.
