Shillong, Risaw 17: Ka kynhun ialehkai ka Mawlai SC ka la iakhun tyngeh ban lah ban ioh rah ia ka nam kum ka lahduh ka lympung ialehkai jong ka Shillong Premier League 2025, kaba la long ha SSA Stadium, First Ground Polo, hadien ba ka la lah ba kan pynliem noh ia ka kynhun ialehkai ka Nongrim Hills da 3-0.
U namtam ha kane ka jingialehkai dei u Robertson Khongriah (54’, 84’) uba la lah ban lam khmat ia ka Mawlai SC ban the par kol bad sa shi kol la thep ia ka da u Banraplang Pyngrope (76’).
Kumta ha kaba kut jong kane ka jingiakhun, lada yn ia phai sha ka miej iakhein point, lah ban ong ba kam shim don satia ka jingkylla ha ki kyrdan ba ki klob ki ioh ba kin ia bat, kampher wat lada ka kynhun ialehkai ka Mawlai SC ka la ioh ba kan khur 18 point bad sah sa kawei pat ka jingialehkai ba kan iakhun.
Hynrei ka Shillong Lajong FC, lashai pat ka sngi, kan hiar ban mih madan ban iakhun pyrshah ia ka Nangkiew Irat, kaban long ha ka por 4:30 nohphai sngi, kaba hangne lada jia ba ka Lajong ka jop ia kane ka jingiakhun, kan pynlong ia ka ba kan rah ia ka nam kum ka lahduh jong kane ka samoi ialehkai kaba mynta, hynrei lada jia pat ba ka Nangkiew ka lah ba kan iakhaid ne pynrem ia ka Lajong, kan pynlong pat ia kane ka lympung ban ap ia ka rai kaban mih na ka jingiakhun kaban long ha ka sngi nyngkong ka taiew kaban wan hapdeng ka Mawlai SC pyrshah ia ka Rangdajied United FC.
Pynban lada jia ba ka Lajong bad ka Mawlai ki iakhaid ha ka liang ka jingioh khur point, ia ka rai mano ban rah ia ka nam lahduh ka SPL mynta ka samoi kan leit sha ka jingiakhmih ia ka resol ba iakhun hapdeng kine ki ar kynhun ne ka head to head, kaba hangne, u sawar u la noh lypa sha ka kynhun ialehkai ka Lajong, namar ba ka la lah ba kan pynliem ia ka Mawlai da 4-3, ha ka jingiakhun kaba la long ha ka 1 tarik mynta u bnai Risaw.
Kumta ha kaba kut jong ka jingiakhun kaba mynta ka sngi, ka kynhun ialehkai ka Nongrim Hills ka la hiar noh artad ialade sha ka kyrdan iakhun jong ka First Division, hadien ba ka la lah ba kan ioh ban khur tnoit tang shi point na ki 9 sien ialehkai kiba la dep.
Mano pat ban synran lang ia ka Nongrim Hills sha ka First Division kan shong pat na ka resol jong ka jingiakhun kaban long hapdeng ka Malki SC pyrshah ia ka Sawmer SC, kaban long lashai ka sngi ha ka por 1:30 nohphai sngi.
