SPL 2025 | Lait salut ka Laitkor ban hiar kyrdan da ka jingjop ia ka Sawmer

Shillong, Risaw 15: Ka kynhun ialehkai ka Laitkor SC, war ka la lait shi syndon ilade na uta u line saw (relegation zone) ban shah hiar noh na ka lympung ialehkai jong ka  Shillong Premier League 2025, hadien ba ka la lah ba kan pynliem ia ka kynhun ialehkai jong ka Sawmer SC da 2-0, ha ka jingiakhun ba la long hynne ka nohphai sngi ha SSA Stadium, First Ground, Polo.

Ia kine ki artylli ki kol ka Laitkor SC, la thep ia ki da u  Giovanni Syiemiong (30’) bad Rikmenlang Nongrum (64’) ha baroh ar kylla jong kane ka jingiakhun, kaba pynlong artad ia ka ban khur ia ka jingjop kaba lai ka jong ka ha kane ka samoi ialehkai ba mynta jong ka SPL.

Dei lyngba kane ka jingjop, ba ka Laitkor SC ka la ioh ba kan khur 11 point bad ba kan don ha ka kyrdan kaba san, katba ka kynhun ialehkai ka Sawmer SC, kane ka namrem ka pynlong ia ka ba kan hiar sha ka kyrdan ba 7 hadien ba ka la ioh ba kan khur 9 point.

Haba phai sha ka jingthep ia kine ki kol, ka kol ba nyngkong ka  wan hadien ba u Giovanni, u la don ha ka  khep kaba u kylluid bha bad wut ban ioh rah shakhmat  ia ka bol  bad ban sah satang para marei bad u Jeffrey Jyrwa rang ap kol ka Sawmer, uba la tur shakhmat ban khanglad ia u, pynban katba un da lah ban pynurlong ia kane ka jingthmu, u Giovanni, u la lap ba ioh pynpar lyngba ia ka bol bad ir ban pynkhih ia ka jar.

Ha shwa ba ka jingiakhun kan khreh jam sha ka jingidih um sohjew, ka Laitkor SC ka  pynpaw sha u referee ba la don ka syrwet kaba lam kum ka handball, ia kaba u referee ba pyniaid ia kane ka jingiakhun u la kyntait ia ka.

Haba wan ban ia bteng ia ka kylla miet, ka Laitkor ka la ioh biang ia ki kato katne ki kabu ksiar ban pynkhih ia ka jar, pynban dei  tad haduh ka khep jong u Rikmenlang ba u la ioh ba un head ia ka bol kaba dei ka corner ban pynkhih biang ir sa shisien ia ka jar, kaba ha kum kane ka khyllipmat, kum ka kynhun ka Laitkor SC ka la sngewthuh ba war ka la lah ba kan lait syndon ialade na uta u line saw.