Shillong, Nailur 14 : U Myntri Rangbah ka Jylla Conrad K Sangma, u lah ban wanrah ia ka jing pyn kylla bad ka jingbujli ia ka kynhun Myntri ha kine ki khyndiat sngi ban wan, ong ka khubor kaba iajan bad ka Sorkar.
La khmih lynti ba kan don ka jingweng noh ia ki katto katne ki Myntri ba mynta bad ban wanrah da ka dur thymmai, kum ka sienjam ban ai bynta lem ia kiwei ba kin don ha ka Kynhun Myntri.
Kat kum ka khubor ba iajan bad ka Sorkar, katto katne ngut ki Myntri na ka seng National People’s Party (NPP) bad ki paralok ba iatreilang, ki lah ban shah bujli noh.
Ki Myntri kiba la lah ban shah weng noh ki kynthup ia u Myntri ka Tnad Pule Puthi Rakkam A Sangma, u Myntri ka Tnad Food & Civil Supply Bah Commingone Ymbon kiba dei na ka NPP, Myntri ka Tnad Revenue & Disaster Management Bah Kyrmen Shylla na ka UDP, Myntri ka Tnad Animal Husbandry & Veterinary Bah AL Hek na ka BJP bad Myntri kam ialehkai Bah Shakliar Warjri na ka HSPDP.
Ka khubor ka pyntip ba u MLA bala rangbah bha jong ka NPP na Resubelpara Timothy D Shira u lah ban shah pynrung noh ha ka kynhun Myntri. Ia u Shira la bthah dang shen ba un hiar noh na ka shuki Deputy Speaker ka Iingdorbar Thaw Ain.
Kiwei pat ki MLA kiba lah ban shah pynrung ha ka Kynhun Myntri ki kynthup ia u MLA ka NPP na Jowai Bah Wailadmiki Shylla, MLA ka BJP na South Shillong Bah Sanbor Shullai, MLA ka UDP na Mairang Bah Metbah Lyngdoh bad MLA ka HSPDP na Mawshynrut Bah Methodius Dkhar.
