Shillong, Nailur 14 : Ka Sorkar Jylla kala mang pisa ban pyntrei ia ka surok two-lane na ka shnong Nongkohlew, Mawlai sha New Shillong Township, ka project kaba kongsan ban pynkhlain ia ki lad pyniasoh ha ka thain.
U Symbud Myntri Rangbah Bah Prestone Tynsong ula pynbna ba ia kane ka project, kaba jrong 11.100 kilometer, yn pyntrei ha ka jinglut ba kot T.133.5111 klur.
Ula pyntip ruh ba artylli ki project kila iaid mynta ban pyniasoh ia ka sor Shillong bad ka Umroi Airport.
Ka NESIDS Project ba jrong 14.279 kilometer , kala dep kumba 71% katba ka CRIF project ba jrong 14-20 kilometer, kala dep haduh 76%.
Kine ki project ki long kiba kongsan ban pynkhlain ia ka jingpyniasoh surok hapdeng ka Shillong bad ka Kad Liengsuin.
Ki don ruh bun kiwei ki project kiba la pyntrei mynta bad don ruh kiba dang pynkhreh. Kine ki kynthup ia ka surok Lummawsiang sha Mawsiatkhnam (75% la dep), Mawlai Motsyiar sha Mawla Umjaiur (90% la dep), Mawlai Nongkwar (Block 6) sha Patarim (Block II) (95% la dep), Mawlai Nongpdeng Block-A sha Block-B (la ai work order), Mawlai Nongkwar (Block II sha Block 3B) (la ai work order), Office jong ka Dorbar Shnong Mawsiatkhnam sha PHC Mawsiatkhnam (dang pynkhreh ia ka mang tyngka) bad surok na Mawlai Stand Bus sha Kynton Massar (dang khot tender).
Ka jingpynkhreh ia ka mang pisa ia ka surok na Lummawnew sha Nongpathaw ruh ka dang iaid mynta. Dang shen lah dep ai ia ka work order ba khatduh ban pyntrei ia ka surok na ISBT Mawiong sha Lumpyllon hynrei ka kam kan dang ban sdang.
Ia mynta kam shym don satia ka jingtyrwa ban pyntrei ia ka surok na Mawtawar sha New Shillong ka ban iaid lyngba ka shnong Mawpat.
