Shillong, Lber 06 : Ka Sorkar Meghalaya Democratic Alliance -2 (MDA) ba ialam da u Conrad K Sangma, u ban bam smai lashai ka sngi kum u Myntri Rangbah ka Jylla, kan don arngut ki Symbud Myntri Rangbah (DyCM) bad kine ki dei na ka sem jong ka Nationa People’s Party (NPP).
Kine ki Symbud Myntri Rangbah ki dei u National Vice President ka NPP bad MLA ka Pynursla Bah Prestone Tynsong bad u MLA ka Nartiang ma Sniawbhalang Dhar.
U National President ka National People’s Party (NPP) Conrad K Sangma hynne ka sngi ula pynbna ba ka Sorkar MDA-2 kan kynthup ia 8 ngut ki Myntri sorkar na ka NPP, 2 ngut na ka UDP bad mar 1 na ka BJP bad ka HSPDP.
Kat kum ka khubor ba iajan bad ka MDA-2, la iathuh ba ki MLA ka NPP ki ban bam smai kum ki Myntri Sorkar nalor u Bah Prestone bad ma Sniawbha ki ban bat ia ka shuki DyCM, ki dei I Kong Ampareen Lyngdoh MLA ka East Shillong, ma Comingone Ymbon MLA ka Raliang, AT Mondal MLA ka Phubari, Marcuise Marak MLA ka Williamnagar bad u Rakkam Sangma MLA ka Rongara-Siju.
Ki MLA ka UDP ki ban ioh ia ka shuki Myntri ha ka Sorkar MDA-2 ki dei u Bah Paul Lyngdoh MLA ka West Shillong bad u ma Kyrmen Shylla MLA ka Khliehriat.
U MLA ba dang shu jop ha ka sien ba nyngkong eh na ka HSPDP na Mawthadraishan, Bah Shakliar Warjri un ioh ia ka shuki Myntri na kane ka party bad ka BJP pat kala jied ia u MLA ka Pynthorumkhrah Bah A.L Hek.
Ka khubor ka bym pat lah ban pynthikna ba iathuh ba u President ka UDP bad MLA ka Mairang Bah Metbah Lyngdoh u lah ban wan phai biang kum u Lamphang ka Iingdorbar Thaw Ain ka Jylla.
U Conrad hynne ka sngi ula pyntip ba ka NPP ruh kala tyrwa ia ka kyrteng jong u kyrtong ban iakhun ia ka elekshon sha ka shuki Lamphang ka Iingdorbar Thaw Ain bad ba u dang iakren mynta bad ki paralok ba iadon ha ka MDA-2 ban ioh ia ka jingmynjur lang.
