Pyniasoh ki Nongialam ka PDF kynthup u Myntri Sorkar sha ka NPP
Shillong, K’lyngkot 07 : U National President ka National People’s Party (NPP) bad Myntri Rangbah ka Jylla Conrad K Sangma hynne ka sngi saitjain, ula pynpaw ia ka jingsngewskhem ba ka NPP kan sa wan phai biang sha ka bor ha ka elekshon MLA-2023 hapoh ka Jylla.
“Ka NPP kan sa ioh ia ka rai ba pura u paidbah bad ngin ioh ia ka single majority ha ka elekshon 2023. Nga thikna bha ia kane” ong u Conrad.
U Conrad ula kren ia kane ha ka jingialang ban pdiang burom ia u Nongialam ka PDF bad Myntri Sorkar Bah Hamletson Dohling lem bad kiwei ki Nongialam sha ka iing jong ka NPP.
I urge the support of the people to Bah Ham as our candidate for Mylliem Constituency
I extend my warmest welcome to Sh. Ivanlumlang Marbaniang, former President of PDF, Sh. Emlang Lytan, former Gen. Secy. of PDF and everyone gathered in support of Bah Ham to the NPP family. pic.twitter.com/o9qnK4rXZA
— Conrad Sangma (@SangmaConrad) January 7, 2023
Kiwei pat ki nongialam ka PDF kiba pyniasoh sha ka NPP ki kynthup ia u President barim Bah Aiban Marbaniang, u General Secretary barim Bah Emlang Lytan bad u Chief Organizer barim Ribson Ryntathiang.
U Bah Hamlet ula iehnoh ia ka kam MLA jong ka Mylliem Constituency ha ka 5 tarik u Kyllalyngkot.
Haba niew ia kane ka jingwan iasoh u Bah Hamlet kum ka jingpynkhlain ia ka NPP, u Conrad ula ong “Nga la thikna baka jingwan iasoh jong u bad kiwei ki Nongialam kan nang pynkhlain ia ka NPP ym tang ha Mylliem Constituency hynrei kan long ha kylleng ki jaka jong ka Ri-lum Khasi-Jaintia bad ha Ri-lum Garo.
Haba iaroh ia ki paidbah ka Mylliem ia ka jingstad ban jied ia u Bah Hamlet kum u Nongmihkhmat, u Myntri Rangbah ka Jylla ula ong ba mynta la bun ki briew na ka PDF kila iasoh sha ka Iing jong ka NPP namar ki ngeit ha ka jinglong nongialam u Bah Hamlet.
Ula ong baka nongrim ba ieng da u Bah Hamlet kum ia ka Inner Line Permit (ILP), Uranium, ka kajia pud bad kiwei kiwei, kim shym la kylla satia naduh ka por ba u dang long u nongialam ka Khasi Students’ Union (KSU).
“Don ki por ba ki briew ki kylla ia la ka nongrim haba ki wan rung sha ka sain pyrthei, kaei kaba ki ju kren baroh shikatta, kin ym kren shuh hynrei u (Bah Hamlet) la kren shai b aula rung sha ka sain pyrthei ban pyntyllun shakhmat ia ki ishu ba u ju kren” ong u Conrad haba bynrap “Kane ka dei ka dak jong u Nongialam uba la kut jingmut shisha ia ka nongrim ba u ieng bad aiti ialade sha ki paidbah bad mynta ka sngi ka NPP ka sngew donbok bad burom ban ioh ia u nongialam kum u Bah Hamlet ban iasoh sha ka Iing jong ngi bad baroh ki dkhot ka PDF kiba la iawanlang”.
Ka PDF kaba dei kawei na ki seng sain pyrthei ba kyrshan ia ka Sorkar MDA ba ialam da ka NPP, kala sah mynta satang arngut ki MLA hadien ba u Bah Hamlet bad Bah Jason S Mawlong MLA ka Umsning, kila iehnohkam bad mih noh na ka party.
Haba pynpaw ba ka jingpyniaid ia ka sorkar synrop kam dei kaba suk, u Myntri Rangbah ula ong baroh ki seng sain pyrthei bad ki Nongialam ki don iala ka jong ka jingkwah, iala ka jong ka nongrim, ki don la ki jong ki jingsngewkhia bad ki don la ki jong ki lynti ban pynbeit ia ki kam ki jam.
U Conrad ula ong ba ka Sorkar MDA kala lait thaw na kiba bun ki jingtynjuh ha ki saw snem shiteng bad kala lah ban pynbeit ia kiba bun ki jingeh ba tasam.
“Ngi la mad shibun ki jingeh haba mih ki huri hura, shibun ki jingjia kila jia. Ngi la mad ia shibun ki jingeh ha ka por Covid ha kaba ka Sorkar kam lah ban treikam kumba ka long haduh arsnem bad ki kam pynroi kila shu sahkut lut hynrei ngi la jam beit shakhmat bad lait im. Ngi la lah ruh ban pyndep ia kiba bun ki jingkular ba ngi la khlei sah ki paidbah ka Jylla” ula ong.
U Myntri Rangbah ka Jylla ula ong ruh ba ka Sorkar MDA bad ki paralok baroh kila iatreilang kum ka kynhun bad ym don satia mano manor uh ba shim rai nalade shimet.
“Ngi pyniadon bynta lut ia baroh ki Myntri Sorkar, baroh ki MLA, baroh ki seng sain pyrthei..ngi sngap ia baroh halor ki jingpynsngew jong ki paidbah bad ngi sa shim rai da ka jingiasngewthuh jingmut lang” ula ong.
Haba ai jingkren, u Bah Hamlet ula ong ba ma u lem bad kiwei ki Nongialam bad ki Nongkyrshan jong ka PDF kila rai ban iasoh sha ka NPP namar ka dei kaba iatylli bad kaba shimkhia shisha ia ki ishu kiba kiwei ki seng sain pyrthei bad kiwei ki sorkar kim nud ban tare satia.
Ula ong ba hapoh ka jingialam jong u Myntri Rangbah Conrad K Sangma, ka Sorkar MDA ba ialam da ka NPP kala pyni ia ka jingkitkhia haba iadei bad ki ishu kiba jyrwit jyrwat kum ka ILP, ka kajia pud bad kiwei kiwei.
Haba khein kam kai ia kito kiba kynnoh ba ka NPP kala tyrwa T. 5 klur ban wan iakhun na ka ticket jong ka, u Bah Hamlet ula ong “Nga kwah ban sam jingtip sha phi ba nga la rai ban iasoh sha ka NPP khnang ban gin lah ban iai bteng ha kaban shakri ia ki paidbah ka Mylliem bad ka Jylla baroh kawei”.
Ula ong ba naduh ka sngi ba nyngkong ba pynrung ia u kum u Myntri Sorkar, ula kren shai bay m dei ban shah tih Uranium ha Meghalaya. Kat kum ka jingong jong u, ula kyntu ia ka Sorkar ban leh eiei halor ka jingdawa ILP, ban pynbeit ia ka jingiakajia pud, ban kynthup ia ka ktien Khasi bad Garo ha ka khyrnit ba phra jong ka Riti Synshar ka Ri bad kiwei kiwei kiba ktah ia ki paidbah jong ka Jylla.
“Namar kata, ngin nang trei shitom ban pynthikna ba ka NPP kan lah ban thaw ia ka sorkar kaba khlain khnang ba kan lah ban tynruh halor ka jingpyntreikam ia ka ILP bad kiwei kiwei ki ishu” bynrap u Bah Hamlet.
U Bah Hamlet ula pyllait paidbah ruh ia ka report card halor ka jingtreikam jong u kum u MLA ka Mylliem ha kine ki saw snem shiteng. U ong ba kane ka report card ka pyni ia baroh ki kam pynroi ha ki 36 tylli ki shnong jong ka Constituency.
“Ha u snem 2018, nga la kular ia ki paidbah ka Mylliem Constituency ba kin vote ia nga bad ba phin nym babe. Nga la ai ia baroh ki jait skhim sha baroh ki shnong bad kyntoit jong ka Constituency. Nga, lem bad u Myntri Rangbah ngi la tynruh shitom ban lah pyntreikam ia ka skhim JJM, MGNREGA ha ki cencus town bad mynta kiba bun ki cencus town kum ka Mylliem, Mairang, Mawlai bad kiwei kiwei kila ioh jingmyntoi na kine ki skhim” ula kam.
