Shillong, K’Lyngkot 7: U President ka BJP Meghalaya u Bah Ernest Mawrie ha ka sngi saitjain ula pyllait paidbah iaka prokram “Zero Tolerance towards the issue of drugs” (Ym don jingmap halor ki kam droks) da kaba pynlong iaka Anti-Drug Campaign Rally ha West Shillong constituency.
Ha katei ka prokram, ka seng BJP kala pyllait paidbah ruh ia ki 8 tylli ki mat ban ialeh pyrshah ia u drug ha ka jylla.
Kitei ki 8 tylli ki mat ki kynthup ban don iaka jingiatreilang bad kanjingkhmih bniah lang hapdeng ki sorkar jylla, Northeast Anti-Drug Squad, ban thaw iaka Directorate of Prosecution ha Meghalaya, ban don iaki De-Addiction Centre kiba pyniaid da ka sorkar kiban long la ka jong na ka bynta ki kynthei bad shynrang, ka jingai Subsidy/ Grant na ka bynta ki Counseling Center, ka jingai jingiasyllok man la ka por ha ki skul bad kolej, ban pyndonkam iaki Anti-Drug Volunteers ha ki Booth Level bad ban don iaka jingai jingiarap lyngba u Toll Free na ka bynta kito kiba donkam iaka jingsumar.
Ka seng kala sam ruh ia ki pamphlet sha ki nongshong shnong kum shi bynta jongka jingiakhun pyrshah ia u drug da ka jingthmu ban pynsngewthuh ia ki paidbah.
U Bah Ernest Mawrie ula ong, ba yn sa pynlong ia ki prokram bapher bapher ha kylleng ki bynta jong ka jylla ban iakhun ia katei ka jingeh. Ka thong jong katei ka mission kaba la sdang da ka BJP kam dei na ka bynta ka elekshon hynrei kan iai bteng wat hadien bala dep ka elekshon ruh.
U Bah Mawrie ula ong, ba ka Meghalaya ka don kumba 2.5 lak ngut ki nongdih drug kaba long 7.65 % ha ka jingdon ki briew ha ka jylla.
“Ngi kum ka seng ngi shim pura iaka jingkitkhlieh ban weng ia katei ka jingeh bad ban pynthikna ban pyniaid shakhmat ia ka jingkular u Myntri Kam Pohiing ka ri u Amit Shah ka Zero Tolerance ia u Drug” la pynkut u Bah Mawrie.
