Shillong, Naiwieng 19: U kyrtong ka National People’s Party (NPP) napoh ka 17th North Shillong Constituency bah Ransom Sutnga hynne ka sngi u la pynpaw ia ka jingsngewskhem ba un ioh jingjop haka ilekshon MLA-2023.
U bah Ransom u la pynpaw ia kane haka jingialang pynskhem iaka Block Executive Committee jong ka NPP ha North Shillong Constituency da u state president ka NPP u Dr. W.R Kharlukhi haka jingdon lang ruh ki kyrtong ka NPP ba kynthup na Mawlai bah Teibor Pathaw, na Pynthorumkhrah bah Rocky Hek, ka kyrtong na Nongthymmai ka kong Jasmine Lyngdoh lem bad ki nongkitkam ka National People’s Youth Front (NPYF) bad NPP Women’s Wing.
Haba kren ha kane ka sngi u bah Ransom u la kyntu iaki seng longkmie, ki seng samla jong ka NPP ba kidei ban trei shitom naka bynta ban pynthikna ba ka party kan ioh ka jingjop naka bynta ban wanrah ka jingkylla hapoh ka constituency baroh kawei.
U bah Ransom u la ong ba ka thong jong u ban iakhun iaka ilekshon ka dei naka bynta ban shakri iaki paidbah ka thain da ka ba kyntiew iaki kam pynroi khamtam naka bynta ki khun samla jong ka constituency.
“Ngam kwah ban iohi ba don ki surok ba sniew hapoh ka constituency, ngam kwah ban iohi ka jingsniew ki nala pyntuid um hapoh ka constituency bad ngam kwah ban iohi ban don kano kano ka jingduna hapoh ka North Shillong” la ong u bah Ransom.
U bah Ransom u la pynpaw ba u dap daka mynsiem kaba kmen ban iohi ka jingwantuid ki longkmie bad ki samla haka jingialang namar kane ka pynpaw ba ki paidbah ki don shisha ka jingthrang ban don bynta ha kaban wanrah iaka jingkylla naka bynta ka jingmyntoi lang jong baroh.
U la ong ba ki longkmie ki don ka jingkitkhlieh ban pynthikna ba ka constituency kan kiew ha ki bun bynta bad kane kan urlong shisha lada ka NPP ka wan haka bor.
“Nga kyntu iaki longkmie bad ki samla bad baroh ki paidbah ka konstitwensi ba kin trei shitom naka bynta ban wanrah jingjop bad nga ngeit skhem ruh ba ka jingtrei shitom jong baroh kan pynthikna ba ka NPP kan ioh jingjop haka ilekshon 2023” la ong u bah Ransom.
Naka liang u state president ka NPP u Dr. W. R Kharlukhi u la ong ba kane ka constituency ka la pynmih bun ki kyrtong kiba khraw bad kiba la wanrah iaka nam bad burom iaka jylla baroh kawei.
U Dr Kharlukhi u la ong ba ka North Shillong constituency kadei ka jakapdeng haka jingikhun ban ioh jylla ba pura ha u snem 1970-1972.
“Wat pynlong iaka North Shillong kum ka constituency ban shah rkhie bein hynrei donkam ban trei shitom naka bynta ban wanrah biang iaka nam bad burom ym tang hapoh kane ka constituency hynrei iaka jylla baroh kawei” la ong u bah Kharlukhi.
