Shillong, Risaw 07: Ki samla pule ka jylla kiba pule ha Sikkim, kila wanpoi hynne ka janmiet sha Shillong bad kila pynpaw ia ka jingsngewnguh ia ka Sorkar Jylla kaba la shimkhia ban wan shaw ia ki naduh Siliguri, West Bengal.
Kine ki samla pule kila iathuh ba ha ka 4 tarik u Risaw, ka jylla Sikkim kala shah lynshop ha ka bor mariang bad kila dap da ka jingsyier, kumta kila pyntip sha la ki bahaiing bahasem kiba don ha Shillong ia ka jinglong jingman ha Sikkim bad ban phah wan shaw noh ia ki.
Ka Sharon Papang kaba pule ha Himalayan Pharmacy Institute, East Sikkim kala ong, “Ngi la ioh ban iakren bad u Myntri Rangbah ka jylla bad ula kular ia ngi ban wan shaw bad ban pynpoi suk ia ngi sha ïing. Hadien kane, ngi lah ioh iakren bad ki ophisar jong ka Chief Minister Office (CMO) bad ngi la ia phone bad iatreilang haduh ban da phah wan shaw ia ngi. Watla ka don ka jingeh ban ioh Network bad ka jingbym don iaka bording elektrik, hynrei ngi la ioh ban shu phah da ka SMS. Ngi pynpaw ka jingsngewnguh ia u Blei uba la da ker bad sumar sukher ia ngi bad ia ka sorkar jylla kaba la pynbiang nadong shadong ban wan shaw ia ngi bad ban pynpoi shaduh Shillong”.
Ki samla pule kila ong, ba ha ka por ba ki don shathie kila sheptieng bad ki dap ruh da ka jingsngewsih khamtam haba ki paralok kiba ia pule lang kiba na Sikkim kila duh noh ia ka iing ka sem jongki bad kila shu buh ha ka jingduwai ba u Blei yn don ryngkat lem bad ki baroh.
Kine ki samla kiba pule ha Himalayan Pharmacy Institute bad Sikkim Manipal Institute of Technology kaba don ha ka thain Majhitar, kila pynpaw ka jingsngewnguh iaka sorkar jylla kaba la shimkhia ban iakren bad ka sorkar Sikkim ban pynpoi ia ki shaduh Siliguri bad la wan shaw ia ki da ka bus na Siliguri shaduh sha Shillong ha kaba la pynbiang ruh iaka bam ka dih ha ka leit ka wan ka jongki.
Na ka liang ki kmie ki kpa kiba la wan shaw ia la ki khun na ISBT, Shillong kila pynpaw ka jingsngewnguh ia ka sorkar jylla kaba la shimkhia ban peit lem iaka bha ka miat jong ki samla pule kiba sahkut ha Sikkim kaba don hapdeng ka jingshah lynshop ha ka bor mariang.
“Ngi la dap da ka jingsyier bad jingtieng haba ki khun ki jong ngi ki sahkut ha Sikkim kaba don hapdeng ka jingshah lynshop ha ka bor mariang hynrei mynta ngi
dap da ka jingkmen ban iohi ba ki khun ki jong ngi kila wan phai da kaba suk ba saiñ bad ngi ai khublei ia ka sorkar jylla kaba la leit shaw ia ki” la ong ki kmie ki kpa jong kitei ki samla kiba pule ha Sikkim.
Kine ki 26 ngut ki samla pule kila wan poi mynne ka janmiet jong ka Sngi Saitjain, ha ka por kumba 6:42 janmiet ha ISBT.
