Shillong, Naiwieng 19 : U Myntri ka Tnad Pule Puthi Rakkam A Sangma ha ka sngi BA-ar, ula pynpaw ia ka jingsngewkhia halor ka jinglong ka koit ka khiah ki samla pule ba iakhih ka North Eastern Hill University (NEHU) hadien ba kila shah thngan la palat 15 sngi.
Namar kane, u Myntri ula kyrpad ia ki samla ban mynjur noh ha ka ban weng shuwa ia ka jingiakhih naba ka Sorkar Pdeng kala dep ban thung ia ka Inquiry Committee halor ka jinglong jingman ba mynta hapoh ka skulbah.
“Nga kyrpad ia ki samla pule baieid jong nga, lada ki lah ban pynsangeh noh ia ka jingiakhih bad ai ia ka jingai jingmut lane ka jingmih jong ka jingtohkit namar ka koit ka khiah jong ki ka long kaba kongsan, ka pule puthi ka long ruh kaba kongsan..ngim lah ban iapein ia ki da kumno kumno ruh” ong u Rakkam haba iakren bad ki nongthoh khubor.
U Myntri ula pyntip ruh ba u Myntri Rangbah Conrad K Sangma ula dep iakren ia kane ka kam bad ka Sorkar Pdeng ba kan tuklar noh bad ban leh eiei. Ula ong ba Committee bala thung da ka Sorkar India kan sa ai shen ia ki jingai jingmut.
Ha kajuh ka por, u Myntri ula ong ba shen un sa leit ban iakynduh ia ki samla pule kiba iakhih.
