Guwahati, Naiwieng 19: U Myntri Rangbah ka Jylla Assam u Himanta Biswa Sarma, u la pyntip ba iaka Karimganj District yn sa pynkylla noh shaka Shreebhumi.
U Himanta u la pyntip ba ïa kane ka rai la shim haka jingïalang ka Kynhun Myntri Sorkar kaba la long haka 19 tarik Naiwieng.
U la pynksan ba ka jingkylla kyrteng ia ka District Karimganj sha ka Shreebhumi, kadei kaba donkam bad ka don jingiadei ha ka History bad ka ktien.
U Himanta u la batai bniah ia ka jingiadei jong ka History da kaba pynkynmaw ba u myllung ba pawnam u Rabindranath Tagore u la khot ia katei ka thain kum ka “Sundori Shreebhumi” ha ka por ba u leit sha Sylhet ha u snem 1919.
“Ka kyntien Shreebhumi ka kit ïa ka jingmut ha baroh ar ki ktien Assamese bad Bengali, kaba ïahap bad ka pateng jong ka thaiñ” la ong u Himanta.
Lyngba ka Twitter X U Myntri Rangbah ka Jylla Assam u la ong “Palat 100 snem mynshwa, u Kabiguru Rabindranath Tagore u la batai ia ka Karimganj kaba mynta ha Assam kum ka ‘Sribhumi’- ka ri jong ka Maa Lakshmi. Mynta ka sngi ka Kynhun Myntri ka la pyndep ia kane ka jingdawa kaba la slem bha jong ki paidbah jong ngi”
