Shillong, Lber 01: Ka Shillong All Faith Forum (SAFF) hynne ka sngi Thohdieng, kala kyntu ia ka Sorkar Meghalaya bad Sorkar Assam ban iakren bad ban pynbeit haba iadei bad ki kam thombor ia ki riewngeit khristan kiba sah ha ki thaiñ khappud.
Hashuwa kane ka SAFF kala lum ka jingialang kaba kyrkieh ban iakren halor ki jingmih ki khubor shah thombor bad jingshah byrngem ki riewngeit Khristan ha ki thaiñ khappud jongka jylla Meghalaya bad Assam.
U President ka SAFF u Bishop Purely Lyngdoh, ula ong ka jinglong jingman hapoh ka ri India, hapoh ka thain shatei Lammihngi khamtam hapoh ki khappud ka Jylla Meghalaya kala sakhi ia ka jingshah thombor bad shah byrngem ki riewngeit.
Ula ong, mynshwa ka thaiñ shathei Lammihngi kadei ka thain kaba im hapdeng ka jingialong shngain jong baroh ki riewngeit, watla ki don da ki spah tylli ki niam, ki riewlum, ki ktien thylleij bad ki riti dustur.
“Ka long kaei kaei kaba sngewsih ba mynta la sdang sakhi biang ka jingshah thombor bad shah byrngem ki riewngeit kiba don ha ki thaiñ khappud ka Meghalaya-Assam” ong u Bishop Purely.
U Bishop ula ong, ba kane ka jingsdang sakhi ka jingshah thombor bad shah byrngem ki riewngeit ka lah ban dei ruh namar ka jingdon kiba shimkabu ki kato katne ngut kiba kwah myntoi shimet khamtam ba mynta ba la jan ka ilekshon.
“Ka SAFF ka kyntu iaka Sorkar Meghalaya bad Sorkar Assam ba kin bteng ki jingiakren bad kin wad bniah halor ki khubor ba mih ki jingshah thombor bad shah byrngem bad kidei ruh ban leh eiei ban tehlakam ia kum kine ki jingjia kiba thmu ban wanrah ka jingiapher niam hapoh ka ka thain baroh kawei” ong u President ka SAFF.
 hynne ka sngi Thohdieng, kala kyntu ia ka Sorkar Meghalaya bad Sorkar Assam ban iakren bad ban pynbeit haba iadei bad ki kam thombor ia ki riewngeit khristan kiba sah ha ki thaiñ khappud.){kind=link}