Shillong Naitung 24: Ka Myntri ka koit ka khiah ka jylla ka Kong Ampareen Lyngdoh hynne ka Sngi Nyngkong kala pynpaw iaka jingsngewkhia ba bun ngut ki Doctor kim treh ne kloi ban leit pyntbit shuh shuh (specialized), kaban long ka jingiarap ha kaba iadei bad ka jingduna ki ‘Specialist Doctor’ ha ka jylla.
“Kaei kaba nga lah lap na ka jingleit jngoh ka jong nga, ka long ba bun ki doctor kim long kiba kloi ban leit pyntbit shuh shuh ialade. Ka paw ba baroh ki kmen ban long tang ki doctor sorkar bad ban don iaka MBBS Certificate,” ong ka Kong Ampareen Lyngdoh haba iakren bad ki nongthoh khubor.
Kala pynpaw ba ia kane donkam ban pynkylla noh bad kala ong, “Ka jingkylla kam lah ban wan na ka sorkar, kadei ban wan na ki doctor, kiban lah ban iohi nyngkong eh iaka jingkylla dalade hi”.
Ka Kong Ampareen kala ong, ba kim shym la iohi than ba kan don ka jingduna eh jong ki specialists doctor hynrei ka don ka jingduna ha kaban trei shitom ia ka kam.
“Haba ianujor iaki jingdon jong ki tiar ki tar kiba la pynbiang da ka sorkar bad ki jingdon kiba la pynbiang da ki riewshimet, phi lah ban iohi iaka jingiapher. Ngim lah ban tip ia ka daw, la kadei na ka tulop ba ka long kaba rit? La kadei ka rukom treikam namar ba ka long ka bym biang bad ngi donkam ban ïit bad ban tih bniah bha halor kane” ong ka Myntri Sorkar bad ka bynrap ba ka jingleit ka jongka sha kylleng ki bynta jong ka jylla ka long ban tip bad lap ia kine ki jingduna baroh.
Kala banjur ruh iaka jingdonkam ban don iaka polisi treikam kaba iadei bad ka jingpynkynriah kam bad jingthungkam na ka bynta ki Doctor bad ki Nurse.
“Namar baroh ki don iaka jingpynsngew ba ki Doctor kin eh beit tang ha kawei ka bynta jong ka jylla, haba don ki doctor kiba kyntait ban leit trei ha kiwei pat ki bynta jong ka jylla. Kumta kane kala pynthud iaka rukom ai jingshakri ha kakoit ka khiah bad ngi kyrmen skhem ba ngin lah ban pynbeit noh ia kane ka jingeh”.
Ka Kong Ampareen kala pyntip ba ka sorkar jylla kala dep ban thaw ia ka Recruitment Board, kaban dei ka bor kaban khmih iaka jingpynslem ha kaban khot aplikeshon na ka bynta ki Doctor bad ki Specialist ki bapher.
Kala ong ruh ba ka sorkar kala phah ruh iaki Doctor ban leh ia ki Short Term Courses bad ka Batch kaba nyngkong kala pyndep ia katei ka jingioh jinghikai kaba shipor.
Ka Myntri kala ong ruh ba kan sa pyndep ia ka jingleit jurip ia kylleng ki jaka kiba don ha ka jylla bad ka khmih lynti ba kan pyndep ia kane hashwa ban kut u Nailur khnang ba ha u bnai Risaw yn ioh ban pynkhreh ia ki jinglap baroh na katei ka jingleit jurip.
Pule lang ia kane: Dawa ka VPP ban ailad shuwa ia ki riewlum ka Jylla ban long ki Nongbishar ka Meghalaya High Court
