Dimapur, Nailur 30 :Ka seng Congress ha Nagaland kala pynpaw ka jingsngewkhia halor ka jingkhot jong u Myntri ka sorkar pdeng u Amit Shah ia ka seng Eastern Nagaland People’s Organisation (ENPO) ban iakren ha kaba iadei bad ka jingdawa ia ka jylla “Frontier Nagaland.”
“Ka jingkhot iakren jong u Myntri ka sorkar pdeng ia ka ENPO ha kaba iadei bad ka jingdawa ia ka jylla ‘Frontier Nagaland’ ha ka 18 tarik u bnai Risaw 2022, ka dei ka mat kaba sngewkhia jur na ka bynta ka Congress bad ruh lehse na ka bynta baroh kiba ieit ia ka jylla Nagaland,” ong u president ka seng Congress ka Nagaland, u K Therie hynnin ka sngi Palei.
Katkum u Therie, kane ka mat ka long ban phiah ia ka jylla Nagaland bad kaba lah ruh ban lam sha ka jingshah pynduh noh ia ka Article 371(A) h ka jylla kumba ka Jammu bad Kashmir kala shah pynduh noh ia ka Article 370.
Utei u heh Congress ula ong ba utei u myntri ka sorkar pdeng u lah ruh ban ai ka jingkular kumba ula lah na ka bynta ki lehnoh Kuki na ka bynta ban ioh khring ia ki vote.
Ka Congress ha Nagaland kala dawa na ka sorkar synrop United Democratic Alliance (UDA) ka jylla ba kan ieng ha ka nongrim kaba shai na ka bynta ki paidbah bad ka sorkar India ha kaba iadei bad kane ka jingdawa ia ka jylla “Frontier Nagaland.”
Ha ka 26 tarik u Nailar ba la dep, ka ENPO kala shim ia ka rai ban ym iashim bynta ha kino kino ki ilekshon ha ka jylla lane ha ka ri tad haduh ba kane ka jingdawa ka jong ka ia ka jylla “Frontier Nagaland” kan urlong.
Na ka liang u Therie ula kynnoh ruh ba kane ka dei ka kam iasylla jong ka sorkar India ban pynpharia ia ka jinglong kawei jong ki jaidbynriew Naga, kaba la pynlong ruh lyngba ka jingbym kitkhlieh jong ka sorkar synrop jong ka BJP bad ka NPF kiba la leh ia ki kam banbor, ki kam leh shiliang khmat ha ki kam pynroi bad ha kaba iadei bad ka ioh kam ioh jam.
Da kaba pynpaw ba ka Congress kala kyrpad na ka bynta ban pyrkhat thymmai ha kaba iadei bad kane ka jingdawa, utei u heh ka seng ula ong ba ka party ka pynthikna na ka bynta ban pynkynriah ia ki tnat treikam sha kito ki jaka kiba dang sahdien bad kut jingmut ruh ban thaw ia ka mini secretariat ha Tuensang kaba don ha ka thain mihngi ne eastern Nagaland.
Da kaba kynnoh ba ka pisa kaba haduh T.300 klur kaba thmu na ka bynta ka eastern Nagaland kala shu jah ha suin, utei u heh Congress ula ong ba ia kiwei pat ki jingiarap pisa la pynlut khlem da pyntrei satia ia ki kam ki kam mynta lah 20 snem kynthih.
