Shillong, Risaw 21: U MLA ka UDP ka Nongpoh constituency Bah Mayralborn Syiem u la pynpaw ia ka jingsngewhun halor ka jingiaid shaphrang ban pyntrei iaka surok Nongpoh-Umden-Sonapur.
Haba kren ha ki lad pathai khubor u Bah Mayralborn u la ong ba ka bynta ba nyngkong jong ka projek kaba 20 km kaba la bei tyngka da ka Sorkar Jylla ka dang iaid shakhmat, ha kaba la khmih lynti ban pyndep ha u bnai Kyllalyngkot-Rymphang jong u snem 2026.
U Bah Mayralborn ula pyntip ba ka bynta kaba ar jong ka surok kaba hap hapoh ka Pradhan Mantri Gram Sadak Yojana (PMGSY) bad kaba jngai haduh 38 km ka dang don hapdeng ka jingpyntrei suki suki.
Hynrei na ka liang u Syiem u la pynthikna ba la buh por ban ïakynduh ïa u kontraktor ban pynkloi ïa ka jingtrei ynda la kut ka aiom tlang.
Ula ban jur ruh ïa ka jingdonkam ban ïada ha surok, da kaba kyrpad ïa ki nongñiah kali ba kin bud ryntih ïa ki kyndon niah kali daka kyntu ruh ba kim dei ban pynher stet haba ki niah kali.
“Nga kwah ban pynpaw ia ka jingdonkam jong ka jingshngain ha surok na ka bynta ki nongleit nongwan kiba pyndonkam ia ka surok. Watla ka surok kaba bha ka lah ban pynkmen ban niah kali, hynrei ka long kaba kongsan ban long kiba husiar. Nga kyntu ia ki nongniah kali shimet, ki kali kit mar, bad ki taksi ban bud ryntih ia ki kyndon ba la buh, nalor kata kiba niah arshaka kidei ban phong helmet na ka bynta ka jingshngain jong ki bad ka jingshngain jong ki nongleit nongwan. To ngin buh hakhmat eh ia ka jing niah kali kaba don ka jingkitkhlieh bad pynthikna ia ka jingleit kaba shngain na ka bynta baroh” u la bynrap.
