Shillong, Risaw 21: Ha ka jingpyni ba phylla jong ka jingiatreilang hapdeng ki Shnong, ki nongrep Pnar na ka shnong Lapangap, West Jaintia Hills, kila ioh ia ka jingiarap na ki Nongrep Karbi ha ka jingot ia u kba na ki lyngka, kaba pyni ia ka jingwan phai biang ka jinglong jingman ba jai jai ha ka thain hadien ka jingiakynad dang shen.
Ka video bala ai da ki bor District ka pyni ia ka jingjia kaba pynsngewtynnad, kaba pyni ia ka mynsiem ka jingiatreilang hapdeng ki ar Jaidbynriew.
Kane ka jingiarap kala wan jur hadien ka jingtuklar jong u Myntri Rangbah ka Jylla, u Chief Executive Member (CEM) ka KAAC bad ki Nongialam Shnong.
U Superintendent of Police ka West Jaintia Hills Jagpal Singh Dhanao, ula pyntip ba ka jingdon jong ki Pulit kan dang iai bteng hapoh ka thain ban ai ia ki lad jingiada bad ban khanglad ia kino kino ki briew ne kynhun ba nabar ba kin wan pynthut ia ka suk ka sain.
Ki bor Pulit kila ai ka jingiaroh ia ka jinglong iai shah bad ka jingkiar ban leh ia kino kino ki kam ba lah ban pynheh ia ka jingjia da ki nongshongshnong ka Lapangap.
