Gangtok, Risaw 04 : Ka Sorkar Sikkim kala pynthikna ba haduh 10 ngut ki briew kila iap ha ka jingwan poi kynsan kynsan ka umsaw ha ka wah Teesta bad 82 ngut ki briew ki dang jah rngai.
Kane ka jingshlei um kala jia hynne ka step hadien ka jingther kynsan kynsan u lapbah lapsan hynnin ka miet ha ki bynta ba shatei jong ka Sikkim.
Ka Sorkar ka pyntip ba ki 10 ngut kiba iap ki dei ki riew paidbah. La iathuh ruh ba paalt 3000 ngut ki nongshangkai pyrthei kila sahkut ha kylleng ki bynta jong ka Jylla.
Ka Sorkar ka pyntip ba haduh 14 tylli ki jingkieng kila twa na kane ka jingshlei um bad 9 tylli napdeng jong ki, ki dei kiba la khmih da ka Border Roads Organisation (BRO) katba 5 tylli ki dei kiba khmih ka Sorkar Jylla.
Haduh 26 ngut ki briew kila wan poi sha ki hospital ha Chungthang kaba hap ha Mangan District bad Dikchu, Singtam kiba hap hapoh Gangtok District lem bad ka Rangpo kaba hap hapoh ka Pakyong District.
Ka Sorkar Jylla kala pan haduh 3 pyrton ki kynhun ka National Disaster Response Force (NDRF) ban wan iarap lem ia ka Jylla bad ia kawei ka kynhun NDRF kaba la don lypa ha Rangpo bad Singtam. La pyntip baka Sorkar Pdeng kala ai ia ka jingmynjur ban phah ia kine ki kynhun.
Ka Sorkar Jylla kala buh haduh 18 tylli ki relief camp ha Singtam, Rangpo, Dikchu bad Adarsh Gaon, kiba la mad ia ka jing shah ktah ba jur eh ha kane ka jingshlei um.
