Gangtok, Risaw 08 : Ka jingiap jong ki briew na ka jingshlei um ka wah Teesta ba bthei ka pung thah Lhonak, kala kiew sha ka 60 ngut da ka jingioh tam ia ki metiap narud ka wah Teesta na ki bynta ba sharum kiba don ha ka thain Jalpaiguri, West Bengal.
Kat kum ka khubor, sa 80 ngut ki briew ki dang jah rngai na kane ka jingshlei um. La iathuh ba ha kine ki 5 sngi, ki kynhun ai jingiarap, kila ioh ban tam palat 30 tylli ki metiap na ki thain Jalpaiguri.
“Namar kane ka jingshlei um, haduh 1320 tylli ki iing kila julor laki laka bad lah ioh ban pyllait ia 2563 ngut ki briew na ki jingma, ha kaba 26 ngut kila don hapdeng ka jingmynsaw bad la rah sha Hospital. 13 tylli ki jingkieng ba sharum jong ka Tessta-V Hydropower Station kila ngam bad shah rong noh ha ka um, kaba la pyndkut ia ka leit ka wan sha North Sikkim” ong ki Heh Sorkar.
Palat 3000 ngut ki briew kila sahkut ha Lachen bad Lachung kiba hap ha Mangan District namar ka jingbym don lynti shuh ban iaid.
Ki shipai Indian Air Force kila pyrshang katba lah ban leit shaw ia ki briew ba sahkut bad ai ia ki jingiarap da ki Mi17 helicopter hynrei kim shym la lah satia ban mih na Bagdora bad kumjuh ruh na Chaten namar ka jingsniew ka suinbneng.
Ka IMD kala iathuh lypa ba ka suinbneng ha Lachen bad Lachung kan dang iai sop lyoh ha kine ki san sngi ban wan bad namar ka jingrben u lyoh, ka jingleit shaw ia ki 3000 ngut ki nongshangkai pyrthei kala don hapdeng ka jingeh.
