Gangtok, Lber 26: Ki shipai Army bad ki heh ka tnat Border Road ki la ioh ban pyllait ia kumba palat 1400 ngut ki nongwan shangkai pyrthei (tourist) kiba sahkut namar ka jinghap thah kaba jur tam ha Sikkim mynta u bnai, kata kat haduh mynta.
Ka Sikkim ka la sakhi ia ka jinghap thah kaba jur man la u snem ha ka por tlang, hynrei kane ka jinghap thah ha ka kynti kaba mynta ka long kaba kham pher namar ka jingsakhi ia ka jinghap thah kaba kham dier por bad kaba kham jur.
Watla ka dei ka jaka kynjang kaba shem shitom bad wat hapdeng ka jingkhriat kaba tasam hynrei ki bor shipai na ka tnat Trishakti Corps bad ki heh na ka tnat Border Roads Organisation (BRO) ryngkat lang ki la iashim bynta ha kaba pynkhuid ia u thah ba rben ha ki lynti surok khnang ban pyllait lynti ia ki nongshong shnong kumjuh ia ki bor shipai bad ki touris.
Ka tnat shipai Trishakti Corps barabor ka ju shim bynta ha ka ban leit pyllait ia ki tourist ki ba sahkut namar ka jinghap ior kaba kynsan kynsan. Ha ka 11 bad 15 tarik mynta u bnai kane ka tnat shipai ka la leit ban aijingiarap ha ka thain East Sikkim lyngba ka”Operation Himrahat”.Ki la don haduh 1400 ngut ki tourist kiba sahkut ia kiba la lah ban pyllait wat hapdeng ka jingkhriat tasam.
