Nongstoiñ, Nailar 28: Katba ka jingpynkhreh jong ka sorkar Assam bad Meghalaya ka dang iaid shakhmat ban sdang їa ka jingїakren pynbeit pud jongka wat kaba ar kaba kynthup lang ruh їa ka Langpih sector, ki riew rangbah katei ka thaiñ kila pynkynmaw ia ki kam thombor jong ka Assam ba pynjaw ummat bad pynpait dohnud ia ki paidbah jong ka Jylla.
Kine ki riew rangbah ki dei u Bah J Wanniang, u nonghikai skul bala shongthait, u Bah J Kharsyiemlieh, Sordar barim ka Shnong Umtap bad kiwei kiwei ki riew rangbah ka thain.
Haba pynpaw ia ka jingsngewnguh ia ka Sorkar MDA kaba la shim ia ka sienjam kaba donkam tam kaba la khmih lynti da ki paidbah da ki phew snem, kine ki Rangbah kila pynpaw “Shuwa ba ka Sorkar kan sdang ia ka jingiapynbeit pud kynthup ia ka Langpih Sector, ngi kwah ban pynkynmaw ia ki katto katne ki jingjia kiba pynpait dohnud ia ki paidbah lada ki dang kynmaw”.
Kine ki rangbah kila iathuh ba ka jingjia iakajia pud ba nyngkong eh ka dei kaba jia ha u snem 1979 namar ka jingwan buh ktem jongki Pulit Assam ha Langpih.
“Ka jingkulmar kaba jur kala mih ha une u snem hadien ba ki Masi bad Muid jong uwei u Nepali kila wan pynjulor ia ki jingthung jingtep ha ki lyngkha jong ki paid Khasi. Kane kala jia tang namar ba une u Nepali ula pyllait lan ia ki masi bad ki muid” kila iathuh.
Ki iathuh ba une u Nepali ula leit ujor sha ki Pulit Assam kiba la leit ban kem ia ki katto katne ki rangbah Khasi kaba la lam sha ka jingkulmar kaba jur.
Ki paidbah na ki shnong ka thain kynthup naduh ka Mawdiangsnam, Umpha, Langpih, Umyiap, Umtap, Mawlan, Umwah siang, Umwali bad kiwei kiwei ki shnong ki la iehnoh їa ki їing ki sem, ki jingri jingdup, ki kper ki phrahna ka jingthombor jong ki Pulit Assam.
La iathuh ba kine ki paidbah kila wan kiew sha Kyndongei kaba їa jan bad ka shnong Mawkapiah, Nonglang bad Kyrdum bad ki la shong shnong ha katei ka jaka bad don ruh kiba leit shong ha Nonglang, Nongstoiñ bad kiwei kiwei ki jaka ban lait na ka jingthombor ki Pulit Assam.
Kine ki Rangbah kila iathuh ba hadien kane ka jingjia, ki paid Khasi kiba sah ha ka thain Langpih kila mad ia shibun ki jing shah thombor ha ki Pulit Assam tang namar ka jingiakajia bad ki Nepali kiba wan buhai shnong ha ka thain kaba lam ruh sha u pud ban pynpra ia ka Raidmynsaw ME School.
Kawei ka jingjia kaba pynjaw ummat kthang їa ki paitbah ka thaiñ, ka dei ka jingshah siat їap jong ki saw ngut ki rangbah Khasi ha ki pulit Assam kaba la jia ha ka 14 tarik Jymmang 2010, kaba ym pat ju don kaba kum katei ka jingjia ha kiwei pat ki jaka ia kajia pud hapoh ka jylla la ka long ha Langpih ne ha kiwei kiwei ki bynta jong ka jylla.
Nalor kata, kila pyntip ruh ia ka jingthombor jong ka Assam ban knieh jubor їa ka їing ba la thied da u (L) bah Hopingstone Lyngdoh bad phah shong ia ki nongtrei jong ka Forest Department haduh mynta.
Ki jingthombor jong ki Pulit Assam ia ka hok longbriew man briew ruh kala jia na ka por sha ka por haba kdew nuksa ia ka jing pynsangeh jubor ban pynpoi bording sha ka shnong Mawdiangsnam bad Umyiap, ka jingthmu ban wan shna їa kawei pat ka ktem pulit ha kper jong ka kong Kwistilda Lyngdoh Marshilong bad ka kong Sngewbhalin Paliar ha Umwali.
Dang ha ka 31 tarik jong u bnai ba la dep uwei u Kontraktor na Assam ryngkat uwei u heh sorkar, ki la wan thew jaka ha ka kper jong u Bines Nongbah, kaba don ha Umsynrih hajan ka Kamakhya Mandir, kaba jngai tang kumba shiteng kilomitar na ka ktem pulit jong ka Assam kaba don ha Langpih, khlem da pyntip їa u trai.
Kitei ki rangbah ki la ong ruh ba ka jingpynkynmaw jong ki їa ka sorkar halor kitei ki jingjia, ka long ba shuwa ban pynbeit їa u pud u sam ha ki jaka kiba hap ha ka Langpih sector, ka dei ban da pyrkhat bad bishar bniah bin pa bin, namar ki paitbah katei ka thaiñ ki їeng skhem halor ki nongrim ba baroh ki shnong kiba u (L) bah Hopingstone Lyngdoh u la pynrung hapoh u pud u sam jong ka map United Khasi & Jaiñtia Hills ki dei ban hap hapoh ka Meghalya kata ha West Khasi Hills District.
Kila ong ba lada bakla ia kane, kan wanrah їa ka jingїakhih kaba kham shyrkhei ban їa ki por ba la dep namar ki paitbah ka thaiñ khlem artatien kin kylla long ki phetwir ha la ka jong ka ri.
