Shillong Naiwieng 16: Ki paidbah na kylleng kila tuid sha ka tamasa Cherry Blossom ha ka sngi nyngkong kaba la long ha Madan Kurkalang, Ri Bhoi District ha ka sngi Thohdieng.
Ha kane ka sngi sdang jong ka tamasa ki nongwan peitkai kila dap da ka jingbitar namar ka jingdheng kali kaba 2-3 kynta na Shillong sha katei ka jaka ba pynlong ia ka tamasa kaba jngai 34.5Km. Ka jingdheng kali kala long kaba jur bha khamtam haba baroh ki ia beh lut ban iohi ia ka jingpynshongshit jong uAkon bad kiwei pat ki kynhun rwai. Haba ki nongpeitkai kila rung shapoh ka jaka kaba long ka tamsa kila dap da ka jingkmen ban sakhi ba kane ka tamasa ka long kaba heh bad kaba shongshit ban ia u snem bala dep ne ia ki snem kiba la leit noh.
Ha kane ka tamasa la wan ban peitkai da ki briew na kylleng ki bynta jong ka thain shatei lammihngi bad na kylleng ki jylla jong ka ri India bad wat ia kiba nabar ri ruh kumjuh.
Haba iakren bad ka Shlem, ki shijur kiba wan na New Delhi, kila ong ba ki dang da ka jinsgngewkmen ia kaba kim shym la poi pyrkhat ha kaba ki kynhun tem bad ki dukan kiba don ha ka jaka pynlong tamasa ka long kaba biang bha. Katba u kurim pat ula ong ba ula wan ban peit ia u Akon, Queen Sensation bad Boney M bad kane ka tamasa ka long kaba sngewtynnad bha.
Ha ka sngi nyngkong jong kane ka tamasa la ioh iaka jingpynbyrngia bad jingpynshongshit na ka Rito Riba ka nongrwai na Arunachal Pradesh, kaba la pdiang sngewbha ia kiba wan sha ka tamasa da ka jingrwai “Heer Ranjha.” Hynrei haba ka Queen Sensation kala sdang da ka jingrwai “Bohemian Rhapsody,” ym don ba kynmaw shuh ia ka jingdheng kali. Naduh kiba rit haduh kiba la heh kila ieng ban ia rwai lang da ka jingsngewkmen bad da kaba pynmih ia ka sur kaba jam. Ka kynhun Queen Sensation, kaba rwai ia ki jingrwai jong ka kynhun tem kaba pawnam Queen bad kala nang pynkhraw iaka kyrteng jong (L) Freddie Mercury ha Madan Kurkalang.
Hynrei kiba bun hi kiba la wan sha ka tamasa ka long ba ki ap ban iohi noh ia u Akon ba yn rwai ia ki jingrwai kiba pawnam ki jongu kiba la pynshohbiej bad pynsngewtynnad ia ki nongpeitkai baroh ban rwai lang ia ki jingrwai kiba ula rwai ha ki snem kiba la leit noh.
Hadien ba u Akon ula dep ban rwai kiba bun na ki nongpeitkai kila ia mih noh na katei ka tamasa da kaba shim ba katei ka tamasa kala kut noh ha katei ka sngi kaba nyngkong.
Hynrei kito kiba la rangbah ha ka rta kila ap pynneh beit bad kial dap da ka jingkmen bad la sakhi ba kila ieng ban shad baroh shiteng kynta haba u ‘Daddy Cool’ ka kynhun Boney M ula mih kynsan hapoh ka rynsan ha kaba kia paidbah kila ia rwai bad shad kmen ia ka jingrwai “Rasputin”, “Rivers of Babylon” bad kiwei kiwie.
Ki paidbah kiba la mih na katei ka tamsa kila bteng ban mad biang ia ka jingdheng kali ha kaba kala shim por ia ki 2-3 kynta na Shillong banpoi sha katei ka tamasa hynrei haba kial leit phai pat kala shim por haduh 5 kynta ia ki ban poi sha la iing. Ka surokbah kala dap smam da ki kali ha kaba wat ki kali jong ki heh ki haiñ kim shym la ioh ban khih, baroh kila hap ba nshong ban ap ia u lain uba jrong.
Watla ki paidbah kila mad ia katei ka jingdiaw na ka jingdheng kali hynrei lah pat ban ongba ha kine ki sngi ban wan bun kin sa iakren shaphang ka jingsngewtynand jong katei ka tamasa.
