Shillong Naiwieng 16: Ka Mawlai Town Dorbar (MTD) kaba dei ka synjuk jong ki 17 tylli ki Dorbar Shnong hynne ka sngi Saitjain, kala shim ia ka rai ba kan nym shah shuh ia u Vice Chancellor ka NEHU u Prof PS Shukla, ban iuhkjat ha u pud u sam jong ka Mawlai baroh kawei.
Ka MTD kala shim ia katei ka rai hadien ka jingwan iakynduh ia ki samla kiba iashimbynta ha ka jingiakhih da kaba shah thngan, ban dawa pynhiar shuki noh mardor ia u Prof PS Shukla kum u VC lem bad kiwei pat ki heh jong ka skulbah NEHU.
Ka MTD hapoh ka jingialam u President Bah Herlambok War, Bah Sorbar Lyngdoh Nongpyuir Vice president, Dr Marco Mitri, Secretary, Bah Lumsyntiew Lyngdoh, Asst.secretary, Bah Kim Khongkliam, Treasurer ryngkat lang bad baroh ki Rangbah Shnong jong ki 17 Dorbar kala pynbna ban ym shah shuh ia u Prof PS Shukla ban iuh kjat ha ka shnong Mawlai, ka long kum ka dak ban ai ka jingkyrshan kaba pura ia kane ka jingiakhih ki samla pule hapoh ka jingialam ka NEHUNSA bad NEHU KSU Unit.
Ka MTD kala pynpaw ruh ia ka jingsngewkhia halor ka jinglong jong ka koit ka khiah jong ki samla pule kiba la shong shah thngan bad kala ai jingmut ruh ba kin shim noh da kiwei ki lad ki lynti ban bteng ka jingkhih ka jong ki.
