Shillong, Nailur 15 : Ki shipai ka 119 Territorial Army, ki la pynlong ïa ka rally thuk thuk ha ka sien kaba 40 na Kenches Trace sha Cherapunji bad wanphai biang kum shi bynta ban rakhe ïa ka Platinum Jubilee.
Kane ka rally ba la pynlong ha ka 15 tarik u Naiwieng, ka la pyni ym tang ïa ka jingïatreilang bad ka jinglong ryntih jong ki shipai Territorial Army hynrei ruh ka jingaiti jong ki ha ka jingïadei bad ka imlang sahlang bad ka jingleit shangkai sawdong sawkun.
Kane ka rally ka la sdang naduh ka por mynstep na Kenches Trace bad ki nongniah thuk thuk kila iaid lyngba ki jaka ba itynnad bad ki surok kiba kyllain, ban poi sha Cherapunji. Ka jingwan phai ruh ka la long kaba pynkmen kumjuh bad la pynkut da ka jingpdiang sngewbha ha Kenches Trace.
Kane ka rally ka thmu ban wanrah ïa ka jingïadei paralok hapdeng ki nongïashim bynta, ban kyntiew ïa ka mynsiem jong ka jingïalehkai, bad ban pyni ïa ka jinglah treikam jong ka kynhun shipai jong ka thaiñ. Ka long ruh kum ka rynsan ban iakynduh bad ki nongshong shnong bad ban pynskhem ia ka jingiadei hapdeng ki shipai bad ki paidbah.
U Colonel Devashis Nailk, Commanding Officer ka 119 Territorial Army u la pynpaw ka jingsngewnguh ïa baroh ki nongïashim bynta bad ki nongkyrshan: “Ka rally ka la long kum ka jing pynshisha ïa ka jingtbit bad ka jingaiti lut jong ki shipai ka Territorial Army jong ngi. Ngi sngew sarong ïa ka sap jong ki bad ngi sngewkmen ïa ka jingïatreilang jong ki paidbah kaba kane ka rally ka la wanrah.”
Ka 119 Territorial Army ka ai khublei ïa ki bor synshar shnong, ki nongtrei mon sngewbha, bad ki nongkyrshan kiba la noh synñiang sha ka jingjop jong kane ka jingïalang.
