Nongpoh, Nailur 09 : Ka kynhun ki nongthoh khubor na Ri Bhoi District ki la snohkti lang bad ka ophis u Deputy Commissioner bad Superintendent of Police ka Ri Bhoi District hynne ka sngi ban pynphriang ia ka khubor halor ka jingma kiba mih na u drok lyngba ka jingialehkai paralok kaba long ha madan NCSA Pahamsyiem.
Ha katei ka jingialehkai paralok ka kynhun u SP bad DC ki la pynliem noh ia ka kynhun ki nongthoh khubor.
Ha kawei pat ka jingiakhun shut tie-breaker, ka kynhun ki nongthoh khubor ki la ioh ban khur ia ka jingjop da kaba pynliem da 4-2 kol.
Ïa kane ka lympung ïalehkai phutbol la pynlong da ka ophis u Deputy Commissioner bad Superintendent of Police ha ka jingïatreilang bad ka kynhun ki Nongthoh Khubor ka Ri Bhoi District shibynta ban pynphriang ïa ka khubor halor ka jingma jong u drok ha ka imlang ka sahlang bad ruh ban ong em ia u drok kaba dei ruh kawei na ki lad ba la shimkhia da ka sorkar pdeng ban rad dyngkhong ïa u Drok.
La pynshongkun ia katei ka sngi da ka jingdonlang naduh u Giri Prasad, SP, u Bah MB Tongper, ADC nalor kiwei kiwei ki officer na ka ophis u DC bad SP ka them Ri Bhoi District.
