Shillong, Nailur 08: Ki Dkhot ka Trinamool Congress Students Union hynne ka sngi ki la pynlong ia ka jingshah thngan da kaba kynnoh ba kam don shuh ka rukom thungkam thung jam kaba shai bad kaba khuid ha ka jylla.
Ki dkhot ka Union ki la rah ruh bad ki placard kiba thoh – ‘Ngi dawa na ka sorkar ban pynstet ia ka jingpynrung kam ha baroh ki tnad Sorkar’, nangta ‘Ki jingkhuslai bad ka jingkhihwin ki jingmut jingpyrkhat kadei na ka daw ka jingbym iohkam iohkam’ nalor kiwei kiwei ki jingthoh.
Haba kren bad ki lad pathai khubor u president ka kynhun B.Pyngrope u la ong ba ki la rai ban dawa na ka sorkar bad ruh ia ka sorkar ban sa wan ba ki dei ban pyntikna ba kan don ka jingleh hok haba iadei bad ka thungkam thung jam ha ka jylla.
U la kynnoh ruh ba ka don wat ka jingpynslem haba iadei bad ka jingpynbna ia ka tarik eksam na ka bynta kiba eksam iakhun kam ha ki tnad bapher bapher ha ka jylla.
“La slem bha naduh u 2018 ngi la aplai bun ki kam bad kumba 20 haduh 30 tylli ki kam ngi la aplai, ngi la siew ia ka bai eksam hynrei haduh mynta ym pat don kano kano ka jingpyntip na ka sorkar na ka bynta ka tarik eksam.”
“Ki ong ba dei na ka daw u COVID ba ki hap ban pynsangeh ia ka eksam iakhun kam hynrei ngi iohi kumno ka SCC bad ruh ka State Bank of India ki la sdang ban pynlong ia ki eksam iakhun kam hynrei ka jylla jongngi pat jar jar,” la kynnoh utei u samla.
U la kynnoh ruh da kaba ong b au Myntri Rangbah ka jylla u la dep ban pyntip ha Ïing Dorbar ba ki don haduh 2000 tylli ki kam ba lait ha Police Department. “Hynrei dang shen kawei ka kynhun ki samla kiba īakhih ha jan mot Kiang Nangbah ki la shah khot ha u Myntri uba la pyntip ba ki don pat 800 tylli ki kam ba lait. Kumta ki 2000 tylli ki kam ba kam u Myntri Rangbah ha Ïing Dorbar ki la hiar sha ka 800 ngut. Kumno kata ka lah ban long?”
Da kaba kam ba ka la dei ka por ban iakhun ia ka hok jong ki samla bym donkam donjam u Bansharailang u la ong ba kim lah shuh ban shu shong ha Ïing namar la don lut da ka jingleh bym hok ha baroh ki Liang.
Shuh shuh u ong ruh ba u Myntri Rangbah u la dep ban pynbna ba kan don satia ka eksam CUET ha Meghalaya hynrei mynta pat bun ki khynnah ki la lynniar lut. U la kynnoh ruh ba kiba pass bha na ki tnad bapher bapher kim lah shuh ban leit iakhun ia ki eksam.
“Bun ki samla pule ki kut ha ka jingleit thoh eksam CUET sha Guwahati, Dimapur bad Aizawl. Kumta ngi dawa na ka sorkar ba kan bei ki jinglut jingsep ia ka bai leit bai wan jong kitei ki samla ba leit iakhun ia ka eksam CUET.”
