Shillong, Rymphang 26 : U Myntri Rangbah ka Jylla Conrad K Sangma ha ka sngi Balang ula ong ba ka rai kala shong satang ha ka Sorkar pdeng ban pyntreikam ia ka Inner Line Permit (ILP) bad ban pynrung ia ka ktien Khasi bad Garo ha ka khyrnit ba phra jong ka Riti Synshar ka Ri.
“Kum ka Sorkar, ngi la mynjur ia ka Resolution halor kine ki artylli ki kam. Baroh kine ki mat ki dei ki kam kiba la don ha ki kti ka Sorkar India. Ka Sorkar Jylla ka don da u pud ban leh eiei kata ban mynjur ia ka resolution ha ka kyrdan jong ngi, ban kyrpad ia ka Sorkar India ban pyntreikam ia ka ILP bad pynrung ia ki ktien jong ngi ha ka 8th Schedule..kane ka pyni ia ka jingshimkhia jong ngi ban pyniaid shakhmat ia kane ka kam” ong u Conrad haba iakren bad ki nongthoh khubor.
U Myntri Rangbah ula ban jur ruh ia ka jingdonkam ba baroh kin iapyrshang radbah lang ha kaban pynbor ia ka Sorkar Pdeng ba kan shim rai noh mar mar halor kine ki artylli ki kam.
“Hadien kata, ngi hap ban iatrei kham jan bad ka Sorkar India. Baroh na ngi na ka Sorkar ha ki kyrdan bapher bapher, la ka dei ki MP, la ka dei ka Sorkar Jylla ne ki Seng bapher bapher, bapher kin hap ban shim iala ka jong ka bynta bad nga thikna ba baroh kila leh ia kata hynrei ka dei ka jingkitkhlieh ha baroh ki kyrdan bad nga thikna ba ki MP ba thymmai ka Lok Sabha kin shim lang ia ka bynta ha kaban kyntur ia ka jingdawa bad iakynduh ia ki Myntri ba dei khmih la ka dei ia u Myntri kam Pohiing ne u Myntri Rangbah Duh halor kine ki kam” ula ong.
“Ka donkam ia ka jingpyrshang jng baroh bad nga kyrmen ba ngin lah ban leh eiei ia kane. Na ka liang ka Sorkar, ngi la iai bteng ban buddien ia kine ki kam bad ka Sorkar Jylla kala iai pynbor ia ka Sorkar India ban pyntreikam noh ia ka ILP bad ban pynrung ia ki ktien jong ngi ha ka 8th Schedule” bynrap u Conrad.
 bad ban pynrung ia ka ktien Khasi bad Garo ha ka khyrnit ba phra jong ka Riti Synshar ka Ri.){kind=link}