Shillong, Rymphang 26: Ka seng Jaintia Student Union (JSU) hynne ka sngi Balang, kala kren shai kdar ia ka Sorkar Pdeng bad ia ka Northeast Frontier Railway (NFR) ba kim dei ban wanrah lynti rel ha rilum Jaintia katba kim pat lah ban wanrah ia ki ain kiba khlain ban iada na ka jingwan rung kyrthep ki briew kiba nabar.
Lah ban ong, ba kane ka jingpyrshah ka seng JSU ka dei hadien ka jingmih khubor ba ka NFR ka thmu ban lelh sorjamin ne survey ia ki jaka ban pyniaid lynti rel naduh na Bhoksong, Rajagoan, Baithalangso, Jengkha, Kherani bad Umrangso bad ban pyniasoh shaduh Jowai.
U General Secretary ka JSU samla Neilkee Mukhim, ula kyntu ia ka JHADC ba kam dei satia ban ai No Objection Certificate (NOC) sha ka NFR na ka bynta ka lynti rel katba ka sorkar kam pat lah ban pyntreikam shwa ia ka Inner Line Permit (ILP).
Une u nongialam ka JSU ula ong ruh, ba ka seng ka ai jingmut ruh ia ka Sorkar ba ha ka jaka jong ka lynti rel kadei ban ai noh da ki Medical College, Engineering College bad kiwei kiwei ki jingdonkam.
