Shillong, Jylliew 29 : U Myntri Rangbah ka Jylla Conrad K Sangma ha ka sngi Nyngkong ula pyntip ba ki kam ban wanrah jingkylla kat kum ka juk mynta (modernize) ha Jaintia Hills Autonomous District Council (JHADC) bad Garo Hills Autonomous District Council (GHADC) kila sdang mynta bad baroh artylli ki Council kila pdiang ia ka jingtyrwa jong ka Sorkar ban pynthymmai ia ka rukom treikam jong ki.
Haba thoh ha X, u Myntri Rangbah ula iathuh ba ula shong bishar ia bun ki kam ban wanrah jingkylla kiba la leh ha kine ki artylli ki Autonomous District Council (ADC).
“Kum shibynta jong ka jingpyrshang jong ngi ban pynkhlain ia ki Autonomous District Council, ngi la bthah dang shen ia ki ba kin iatreilang bha bad ka Sorkar ban pynkylla ia ka rukom treikam jong ki kat kum ka juk mynta bad ban wanrah ia ki jingpynkylla kiba kongsan”.
U bynrap ba ki jubab na kine ki artylli ki Council ki long kiba sngewtynnad bha.
“Sngewtynnad ba ki artylli ki Council kila pdiang ia ki jingtyrwa bad ki kam ban wanrah jingpynkylla kila sdang mynta” ula pynpaw.
Haba pynpaw ia ki bynta jong ki jingpynkylla, u Myntri Rangbah ula ong ba ki jingkylla kin dei eh ha ki rukom pyniaid kam ban kham pynbha ia ki jingtreikam bad ka jingioh jingiarap ki paidbah.
“Ki jingpynkylla kin pynleit jingmut eh ha ki service rule, ka pla tyngka, ki rukom pyniaid kam, bad pyniaid kam da ki kor digital ban lah pynlong ia ki council kiba treikam bha, kiba treikam haba shai bad kiba buh hakhmat ia u paidbah” ula ong.
“Kine ki jingpynkylla kin pynsuk ban ioh ia ki jingshakri bad pynsuk ia ka rukom siew ia ki khajna bad kiwei kiwei ki jingsiew” ula ong.
U Myntri Rangbah ula pynpaw ia ka jingsngewskhem ba kane ka jingpynkylla kan wanrah ia ka jingmyntoi kaba khraw ia ki paidbah.
 ha Jaintia Hills Autonomous District Council (JHADC) bad Garo Hills Autonomous District Council (GHADC) kila sdang mynta bad baroh artylli ki Council kila pdiang ia ka jingtyrwa jong ka Sorkar ban pynthymmai ia ka rukom treikam jong ki.){kind=link}