Shillong, Jylliew 29 : U Myntri Rangbah ka Jylla Conrad K Sangma ha ka sngi Nyngkong ula ong ba ka Sorkar Jylla kala sdang ia ka jingiatreilang bad ki tnad treikam bapher bapher ban weng noh ia ki cable ki bym treikam, ki waiar ba shu sdien ldui bad ki jingtei ki bym pyndonkam ha kylleng ka nongbah Shillong, hashuwa jong ka National Games.
Haba thoh ha X hadien ba pyniaid ia ka jingialang bad ki kynhun bapher bapher, u Myntri Rangbah ula ong ba kane ka sienjam ka dei kaba la leh da ka jingthmu ban pynitynnad ia ka dur jong ka sor lyngba ki kam kiba lah ban leh bad kiba iaid da ki bynta bynta.
“La pyniaid ia ka jingialang bad u Deputy Commissioner ka East Khasi Hills, MeECL, Cable Operator, DTH Provider bad ki Internet Service Providers, ban sdang ia ka jingiatreilang ha kaban weng noh ia ki cable ki bym treikam, ki waiar ba shu sdien ldui bad ki jingtei ki bym pyndonkam ha kylleng ka sor Shillong” ong u Conrad.
Haba mynjur ba ka jingdon jong ki cable ba iathain bad ba kyllain ki dei ki jingeh bala don da ki snem, u Myntri Rangbah ula ong ba ka jingpynkhuid ia ki ka dei ka bym lah ban pyndep mar mar hynrei ka dei pat ban sdang noh mynta.
“Kane ka dei ka jingeh kaba la slem bha, bad watla ym lah ban pynkhuid ha ka shimiet, ngi hap ban sdang ia ka kam na kano kano ka jaka” ula ong.
Da ka jingpynkhreh ka Shillong ban pynlong ia ka National Games, u Conrad ula ong ba ka Sorkar kala kut jingmut ban kyntiew kyrdan ia ka jingitynnad ka Sor na ka bynta ki nongwan bad ki nongshongshnong.
U Myntri Rangbah ula khot ia baroh ki Agency kiba don bynta ba kin iatreilang ha kane ka kam khnang ban pynthikna ba ka Shillong kan pyni ialade ia ka dur kaba ikhuid ha ka por ba long kane ka lympung ialehkai.
Ha kane ka jingialang la wan iashmbynta da u Deputy Commissioner ka East Khasi Hills, ki Ophisar naka Meghalaya Energy Corporation Limited (MeECL), bad ki nongmihkhmat na ki cable operators, DTH providers bad internet service providers.
