Shillong, Jylliew 29 : Ka Iingkashari Meghalaya High Court ha ka sngi Nyngkong, kala pynksan ia ka jingai jamin ia ka Sonam Raghuvanshi, ka nongshah kynnoh ba hakhmat ha ka jingpyniap iala u jong u kurim, u nongkhaii na Indoor Raja Raghuvanshi, haba kyntait ia ka jingkyrpad ka Sorkar Jylla ban pyndam noh ia ka jamin jong ka.
Ka Iingkashari Single Bench u Justice W Diengdoh kala kyntait ia ka jingmudui ka Sorkar ba pyrshah ia ka hukum ai jamin bala pynmih da ka Iingkashari Magistrate ha u bnai Iaiong mynta u snem. Ia ka hukum ba pura ym pat shym la pynmih paidbah hynrei da ka hukum ha ka sngi Nyngkong, ka Iingkashari kala shah ia ka jingai jamin ryngkat ki kyndon sha ka Sonam ba kan nang treikam.
Ka Sorkar Meghalaya kala leit mudui sha High Court hadien ba ka Iingkashari Additional District Court (Judicial) kala ai jamin ia ka Sonam ha ka 27 tarik Iaiong, 2026, haba kdew ia ki jingbym lah ki Pulit ban batai shai halor ki nongrim ka jingkem ia ka Sonam.
Ka Iingkashari Magistrate kala pynsngew ba ki bor Pulit kim shym la lah ban pyntip bha sha ka (Sonam) ia ki nongrim ka jingkem, ka jingdonkam kat kum ka Ain, kaba long ka jingpynkhein ia ka hok jong ka Sonam kat kum ka riti synshar.
Kane ka mukotduma ka mih na ka jingshah pyniap u Raja Raghuvanshi ha ka jingwan leh honeymoon bad la ka kurim (Sonam) sha Sohra ha u bnai Iaiong. Ki Pulit kila kynnoh ba une u nongkhaii na Indoor ula shah pyniap da ka jingsylla ka kurim Sonam Raghuvanshi bad ki briew ba ka thong pisa.
